Տպել
Դանակով զինված տղամարդը հոկտեմբերի 23-ին Մոսկվայի Նոր Արբատում ներխուժել է «Էխո Մոսկվի» ռադիոկայանի գրասենյակ: Հարձակման հետեւանքով վիրավորվել է հաղորդավարուհի Տատյանա Ֆելգենգաուերը:
Այդ մասին հաղորդվում է ռադիոկայանի կայքում:
«Ռադիոկայան ներխուժած տղամարդը դանակով հարվածել է ռադիոկայանի հաղորդավարուհի Տատյանա Ֆելգենգաուերի պարանոցին:
Պահապանները բռնել են նրան և հանձնել ոստիկանությանը:
Բժիշկների խոսքով՝ Տատյանայի կյանքին վտանգ չի սպառնում: Այդուհանդերձ, նա հոսպիտալացված է», – ասված է հաղորդագրության մեջ:
Իրավապահ մարմիններում հաստատել են «Էխո Մոսկվի» գրասենյակի վրա հարձակման մասին տեղեկատվությունը:
«Անհայտ անձը վերք է հասցրել լրագրողուհու պարանոցին: Նրան բռնել են և այժմ հարցաքննում են: Հանցագործության դրդապատճառները պարզվում են»,- ասել է աղբյուրը:
