Տպել
Գյումրեցի երիտասարդ գործարար Գարիկ Ուզունյանը նոյեմբերի 25-ից օրական երկուական հաց է անվճար տալիս բոլոր կարիքավորներին: Հացը տրամադրվում է նախապես բաժանված կտրոններով. յուրաքանչյուրը կարող է օգտվել 20 օր: Նախաձեռնությունից օգտվելու նպատակով մարդիկ շտապում են գործարարին պատկանող հացի փոքրիկ փուռ, որտեղից էլ ստանում են նոր թխած հացը:
Տեսարանն ավելի շատ հիշեցնում է 90 ականները՝ հերթ հաց ստանալու համար:
«Սեփական խանութ ունեմ, երբ տեսա, թե ինչքան է ավելացել «վերասյա ու վազվրատ (հին)» հացը տանողների թիվը, զգացի, որ ինչ-որ բան պետք է անեմ: Հացի թոնիրը նոր եմ դրել ու նոր գործն ուզում եմ լավ ձեռնարկով սկսել»,- պատմում է 28 ամյա երիտասարդը՝ հավելելով, որ նախաձեռնության իրականացման նպատակով արդեն ստեղծել է «Կռունկ» բարեգործական հիմնադրամը:
Նախաձեռնությունը կշարունակվի մինչև դեկտեմբերի 31- ը, բայց ինչպես վստահեցնում է երիտասարդը, հնարավորության դեպքում էլ ավելի կերկարացնի: «Ամեն ինչ իմ սեփական միջոցներով եմ անում, իմ աշխատողներն էլ միացել են ինձ: Եթե լինեն մարդիկ, որ ցանկություն հայտնեն միանել այս նախաձեռնությանը, շատ լավ կլինի»,-Sputnik Արմենիային նշեց Գարիկ Ուզունյանը՝ վստահեցնելով՝ շարժվում է «Դիմացինիդ հետ վարվիր այնպես, ինչպես կցանկանայիր, որ քեզ հետ վարվեին» ավետարանական խոսքերով` հույս ունենալով, որ այս բարի գործն իր ծիլերը կտա, ու հնարավորություն ունեցող մարդիկ կփորձեն օգնել կարիքի մեջ գտնվողին:
«Թոշակառու եմ, որդիս նույնպես, մեր թոշակով միայն կարողանում ենք դեղ գնել, սա մեծ օգնություն է: Պատահական ենք իմացել նախաձեռնության մասին, ու ինչպես տեսնում եք, շատրեն այստեղ նույնիսկ այս հանապազօրյա հացի կարիքն ունեք»,- Sputnik Արմենիային վստահեցրին բարեգործությունից օգտվող բնակիչները: «Երիտասարդ տղա է, ինքն էլ հազար ու մի խնդիր ունի, բայց տես, որ մեզ նմաներին է օգնում»:
Ամեն օր այսպես, քաղաքի շատ բնակիչներ շտապում են Գյումրու Սախորովի անվան հրապարակի հարակից հատված՝ օգտվելու երիտասարդի բարեգործությունից:
