Տպել
Առաջնորդանիստ Ս. Սարգիս եկեղեցում մարտի 31-ին Ճրագալույցի Պատարագից հետո կմեկնարկի «Հարության ավետիս» խորագրով կանթեղներով երթը:
Ինչպես տեղեկացրին Արարատյան Հայրապետական թեմի տեղեկատվական բաժնից, երթի մասնակիցները հոգևոր երգերի ու շարականների երգեցողությամբ Ս. Սարգիս եկեղեցուց Մաշտոցի պողոտայով ու Ամիրյան փողոցով կքայլեն դեպի Հանրապետության հրապարակ, որտեղ վառվող կանթեղները կդասավորեն խաչաձև՝ ամենքին փոխանցելով Ս. Հարության Ավետիսը:
Իսկ Մասիսի Ս. Գևորգ եկեղեցու երիտասարդները մոմերով և հավկիթներով կշրջեն տնետուն՝ փոխանցելու Հարության Ավետիսը:
Տոնակատարությունները կշարունակվեն ապրիլի 1-ին: Մի շարք եկեղեցիներում Հարության Ավետիսն ազդարարող Պատարագից հետո տեղի կունենան տոնական համերգներ, ազգային պարերի ուսուցում, երեխաների ձեռքի աշխատանքների ցուցահանդես և այլն: Մանրամասներին կարելի է ծանոթանալ այստեղ:
Ապրիլի 2-ին բոլոր եկեղեցիներում կմատուցվի մեռելոց Ս. Պատարագ, որի ավարտին կկատարվի հոգեհանգստյան կարգ՝ ի հիշատակ բոլոր ննջեցյալների:
