Տպել
Երգչուհի Անահիտ Շահբազյանը նոր տեսահոլովակ ունի, որն իր հանդիսատեսի դատին կհանձնի մինչև մայիսի կես։ Tert.am Life–ի հետ զրույցում Անահիտը հայտնեց, որ նոր տեսահոլովակի ռեժիսորն իր ամուսինն է` երաժիշտ Կարեն Զադիրյանը։ Վերջինս կրթությամբ ռեժիսոր է։
«Տեսահոլովակը վաղուց ենք նկարահանել, սակայն ինչ-ինչ հանգամանքների պատճառով մոնտաժային աշխատանքները ձգձգվեցին։ Հիմա, կարծես թե, մոտենում ենք ավարտին։ Հուսով եմ` մինչև մայիսի կես պատրաստ կլինի»,– ասաց երգչուհին ու հավելեց, որ պարզ տեսահոլովակ են նկարահանել։
«Արևի» նկարահանումները տաղավարում են եղել։ «Սյուժետային գիծ, որպես այդպիսին, չկա, սակայն հետաքրքիր կլինեի դիտել։ Չգիտեմ` ինչքանով է ստացվել։ Ինձ համար էլ է անակնկալ վերջնական արդյունքը, քանի որ ինքս չեմ մասնակցել մոնտաժային աշխատանքներին, այդ ամենով ամուսինս է զբաղվել։ Նա մասնագիտությամբ ռեժիսոր է և շատ օգնեց ինձ։ Կարենն ունիվերսալ անձնավորություն է` ամեն ինչում կա։) Շատ ուրախ եմ, որ կողքիս է,– նշեց երգչուհին ու հավելեց, որ տեսահոլովակը շունչ կտա երգին, որն իր համար շատ թանկ է։ – Այս երգն ինձ համար շատ սիրելի էր և պետք է շունչ տալ, որպեսզի տեսահոլովակով ապրի, մարդիկ հեռուստատեսությամբ տեսնեն, լսեն»։
Այս երգն Անահիտը նվեր է ստացել երգահան Արսեն Գրիգորյանից։ «Շատ բարի երգ է։ Մոտ երկու տարի առաջ Արսենն ինձ նվիրեց այս երգը։ Դա շատ մեծ նվեր էր ինձ համար, որից շատ ուրախացա։ Երգի գործիքավորումն էլ է Արսենն արել»,– ասաց երգչուհին, ով անհամբեր սպասում է տեսահոլովակին։
Հայկական շոու բիզնեսում տեսահոլովակ նկարահանելն էժան հաճույք չէ։ Ոչ կոմերցիոն երգիչների համար նորություններով հանդես գալն այս պատճառով ավելի է բարդանում։ «Ես կոմերցիոն երգչուհի չեմ, բնականաբար, մի փոքր դժվար է փորձել գումար դնել մի կողմ, որ ունենամ որակով տեսահոլովակ։ Շատ ավելին կցանկանամ ունենալ, սակայն այս պահին կարողանում եմ ստեղծել այն, ինչ իմ գումարը թույլ է տալիս»,– ասաց երգչուհին ու շնորհակալություն հայտնեց գործընկերներին` ըմբռնման համար։
«Շոու բիզնեսի ընկերներս հասկանում են, որ ես այն հիթային երգչուհին չեմ, ով կկարողանա սրանով մեծ գումարներ վաստակել։ Ըստ այդմ` զեղչեր ու նվերներ են անում։ Շատ շնորհակալ եմ, որ այդքան լավ մարդիկ են»,– նշեց Անահիտը։
Ամբողջությամբ՝ Life.tert.am
