Տպել
Լողանալու համար ամենամաքուր ջուրը Եվրոպայում գտել են Լյուքսեմբուրգում: Այդ մասին ասված է Շրջակա միջավայրի եվրոպական գործակալության (EEA) հաշվետվության մեջ, որն ուսումնասիրել է հանգստի համար նախատեսված ջրավազանները (ծովերը, լճերը, գետերը) ԵՄ-ի երկրներում, ինչպես նաև Ալբանիայում և Շվեյցարիայում: Ուսումնասիրության արդյունքները հրապարակված են գերատեսչության կայքում:
Ջրի մաքրությունը չափելու համար փորձագետները նմուշներ են վերցրել այն վայրերում, որտեղ կան պաշտոնապես գրանցված լողափեր: Անալիզի են ենթարկվել 21 հազար ջրավազաններ:
Լյուքսեմբուրգում, որն առաջին տեղն է զբաղեցրել վարկանիշում, ջրի մաքրությունը գնահատել են 100 տոկոս: 99 տոկոս արդյունքով երկրորդից հինգերորդ տեղերը կիսել են Կիպրոսը, Մալթան, Հունաստանը և Ավստրիան:
Ընդհանուր առմամբ Եվրոպայի ջրավազանների 85 տոկոսից ավելին համապատասխանում է որակի չափորոշիչներին և «գերազանց» գնահատական է ստացել, նշվում է հետազոտության մեջ: Եթե նկատի առնվի նվազագույն միավորը, որը լողափին անհրաժեշտ է լողանալու թույլտվություն տալու համար, ապա դրան արժանացել է բոլոր օբյեկտների 96 տոկոսը:
Ջրի մաքրության առումով վիճակն ամենից վատ է Ալբանիայում: Այստեղ նախատեսված վայրերում լողանալու համար ջրի որակը կազմում է առավելագույն ցուցանիշի միայն 37 տոկոսը:
