Տպել
ՀՀ Ժողովրդական արտիստ Հրանտ Թոխատյանը չինական ևս մեկ ֆիլմում նկարահանվելու առաջարկ է ստացել: Այս անգամ դերասանը հանդես է գալու չինական պատմական ֆիլմում:
«Դեռևս սցենարին լիովին ծանոթ չեմ, միայն գիտեմ, որ հայ վաճառականի եմ կերպարանավորելու: Իրենց պատմական փաստագրության մեջ նման կերպար կա: Հրավիրեցին, ես էլ սիրով համաձայնվեցի: Ըստ նախնական պայմանավորվածության՝ նկարահանումները կսկսվեն հուլիս ամսին, ամբողջը Չինաստանում է տեղի ունենալու», – Aysor.am-ին տեղեկացրեց դերասանը:
Ֆիլմը ներկայացնում է չինացի տղայի ու ռուս աղջկա սիրո պատմությունը: Ռուս ընտանիքը դեմ էր, որ իրենց փեսան չինացի լինի, աղջկա հայրն ամեն ինչ անում է, որ դստերը բաժանի սիրելիից:
Չինացի տղային մարմնավորել է երիտասարդ դերասան Տոն Չանը:
Ֆիլմի ռեժիսորներն են Ակակի Սախելաշվիլին և Ռեզո Գիգինեյշվիլին, վերջինիս խնդրանքով էլ սցենարիստները ֆիլմում հայի կերպարն ընդգրկեցին, ում պետք է մարմնավորեր Հրանտ Թոխատյանը:
«Սկզբում դա տաքսու վարորդի կերպար էր, շատ փոքր դեր: Բայց հետո մեծացրեցին ու դարձրեցին գլխավոր դերերից մեկը: Մարմնավորում եմ հերոսուհու հոր գործերի կառավարչին, ով անընդհատ զավեշտալի պաշտմությունների կիզակետում է հայտնվում», – մանրամասնեց Հրանտ Թոխատյանը:
ՀՀ Ժողովրդական արտիստը խոստովանում է՝ չինացիների հետ աշխատելն իր համար որքան անսովոր, այնքան էլ հետաքրքիր էր: Հենց այդ պատճառով էլ համաձայնվել է համագործակցել նաև պատմական նոր ֆիլմում:
Դերասանը ռուսական կինոընկերությունների կողմից ևս երկու ֆիլմերի առաջարկներ ունի: Նկարահանումներից մեկը տեղի կունենա ապրիլ ամսին՝ ԱՄՆ-ում, մյուսը՝ Մոսկվայում։
