Տպել
Թուրքիայի հարավ-արևելյան Բաթման քաղաքում հայ երաժիշտ Արամ Տիգրանի անունը կրող այգու մուտքի մոտ գտնվող ցուցանակի վրայից կրկին ջնջել են երաժշտի անունը։ Այս մասին հայտնում է Թուրքիայում հրատարակվող «Ակոս» պարբերականը։
Ըստ պարբերականի` Բաթմանի քաղաքապետարանն օրեր առաջ վերականգնել էր այգու մուտքի մոտ տեղադրված ցուցանակը, որի վրայից անհայտ անձը կամ անձինք ներկով ջնջել էին Արամ Տիգրանի անունը։
Սակայն վերականգնված վիճակում այգու ցուցանակը երկար չի մնացել։ Ցուցանակի վրայից կրկին ջնջել են Արամ Տիգրանի անունը։
Մերձավոր Արևելքի սոխակ համարվող հայազգի երաժիշտը, որը ծնվել է 1934-ին Սիրիայի Քամիշլո քաղաքում, 20 տարեկանից նվիրվել է երաժշտությանը, երգել հայերեն, քրդերեն, թուրքերեն, արաբերեն, հունարեն և ասորերեն։
Արամ Տիգրանը հայկական ժողովրդական երգեր է թարգմանել՝ երգելով քրդերեն և հակառակը։
Մահացել է 2009 թ. օգոստոսի 8-ին։
