Տպել
Գեղարքունիքի մարզը, մարտի 23-ի երեկոյան ժամերից սկսած, գտնվում է ուժեղ քամիների ազդեցության տակ, որոնք շարունակվում են նաև մարտի 24-ի ցերեկային ժամերի ընթացքում:
Ինչպես տեղեկացրին ՀՀ ԱԻՆ փրկարար ծառայության Գեղարքունիքի մարզի ճգնաժամային կառավարման կենտրոնից, քամու պոռթկումները հասել են մինչև 25 մետր վայրկյան արագության: Ճգնաժամային կառավարման կենտրոնում գրանցվել է 2 ահազանգ՝ քամու պատճառած վնասների մասին: Մի դեպքում քամին քշել է Գավառ քաղաքի թիվ 39 բազմաբնակարան շենքի, մյուս դեպքում՝ Աստղաձորի վարչական տարածքում գտնվող թռչնաբուծարանի շենքի տանիքը: Փրկարարները մեկնել են ահազանգի հետքերով:
Ինչպես «Արմենպրես»-ի թղթակիցը պարզեց դեպքի վայրում՝ քամին պոկել և ցած է շպրտել Գավառի թիվ 39 բազմաբնակարան շենքի տանիքի կես հատվածը, իսկ մնացած կես հատվածն այս պահին տեղում ամրացնում են փրկարարները: Բարեբախտաբար, ցած շպրտված թիթեղյա կամ փայտյա կտորները դժբախտ պատահարների պատճառ չեն դարձել:
