Տպել
2016 թվականին վարչապետ Հովիկ Աբրահամյանը հայտարարեց պետական ավտոպարկի օպտիմալացման մասին։ Օտարվեց ավելի քան 1200 ավտոմեքենա։ Դրանց մեծ մասը 1980-1990թթ․ արտադրության, ոչ սարքին վիճակում գտնվող ավտոմեքենաներ էին, որոնք այսպես թե այնպես չէին շահագործվում։ Ըստ էության, կառավարությունը ազատվեց կոռոզիայի ենթարկված ջարդոնից։
Շարքից դուրս եկած և շահագործման ոչ պիտանի մեքենաներից բացի, սակայն, շուկայականից անհամեմատ ցածր գներով օտարվել են նաև մի շարք նոր ավտոմեքենաներ։
380,000 դրամանոց Hyundai
Լուսանկարում պատկերված է 2008 թվականի արտադրության Hyundai Tucson ավտոմեքենան։ Այն եղել է Դատախազության հաշվեկշռին, կրել է 085 GG 01 համարանիշները։ Մեքենաների վաճառքով զբաղվող auto.am կայքում նույն թվականին արտադրված այս ամենագնացը վաճառվում է 5800 դոլարով, կամ 2,781,100 դրամով։ Պետ գույքի վարչությունը, սակայն, այն օտարել է 380,000 դրամով։
226,000 դրամանոց Nissan Maxima
Ցածր գնով վաճառված հաջորդ ավտոմեքենան 2003 թվականին արտադրված Nissan maxima սեդանն է։ Auto.am կայքում, 2001 թվականի արտադրության նույն մեքենան վաճառվում է 1,600,000 դրամով։ Պետականը, սակայն, վաճառվել է 226,000 դրամով։
Mitsubishi pajero V6` 580,000 դրամ
Այս ավտոմեքենայի շուկայական գինը տատանվում է 3,000,000 դրամի շրջակայքում, սակայն այն վաճառվել է 6 անգամ ցածր գնով՝ 580,000 դրամով։
60,000 դրամով Nissan Tiida
Ոստիկանության հաշվեկշռին գտնվող 2008 թվականի արտադրության Nissan Tiida մակնիշի ավտոմեքենան օտարվել է 60,000 դրամով։ Այս մակնիշի շուկայական գինն է 2,300,000 դրամ։
Hyundai Sonata` 1,100,000 դրամ
2007 թվականի արտադրության այս սեդանը օտարվել է 1,100,000 դրամով, մինչդեռ շուկայական գինը կազմում է 2,800,000 դրամ։
Ավտոմեքենաների օտարման գործընթացը շարունակվել է նաև 2018 թվականին։
Այսպես, ապրիլի 9-ին 720,000 դրամով օտարվել է 2010 թվականի արտադրության Nissan Sunny մակնիշի ավտոմեքենան։ Մեքենայի շուկայական գինը կազմում է 2,300,000 դրամ։
Վերոնշյալներից բացի օտարվել է ոստիկանության հաշվեկշռին գտնվող 2008 թվականի արտադրության վթարված Toyota Corolla մակնիշի ավտոմեքենա։ Օտարման գինը՝ 57,000 դրամ։ Նկատենք՝ այս ավտոմեքենայի լուսարձակներն անգամ ավելի թանկ արժեն, քան օտարման գինն է։ Եթե անգամ այս մեքենան վաճառվել է որպես պահեստամաս, ապա դրա արժեքն առնվազն 10 անգամ պետք է գերազանցեր 57,000 դրամը։
