Տպել
Արթուր Ալեքսանյանը դեռևս չի կարող շարունակել մարզումները։ Ըմբշամարտի աշխարհի առաջնությունից վերադառնալուց հետո մարզիկը բժշկական հետազոտություններ է անցել։
Օլիմպիական չեմպիոն, Եվրոպայի քառակի և աշխարհի եռակի չեմպիոն Արթուր Ալեքսանյանը չի վիրահատվի, բայց բժիշկները խորհուրդ են տվել առաջիկա մեկ ամսում հանգիստ մնալ, հետո նոր շարունակել մարզումները: Sputnik Արմենիային այս մասին տեղեկացրեց Արթուրի հայրը՝ անձնական մարզիչ Գևորգ Ալեքսանյանը:
«Մրցաշրջանից վերադառանալուց հետո մենք գնացինք մասնագետների մոտ՝ ստուգումերի: Բուժզննումը ցույց է տվել, որ Արթուրի 7-րդ և 8-րդ կողերի միացման կռճիկային հատվածները վնասվել են: Վիրահատական միջամտություն չի կատարվի, բայց պետք է 1 ամիս ու 10-օրյա հանգիստ վիճակ, որից հետո պարապմունքները կվերսկսվեն»,- նշեց Արթուրի հայրը:
Նա խոսեց նաև եզրափակիչ գոտեմարտին չմասնակցելու հոգեբանական բարդության մասին։
«Բոլորս էլ շատ ենք ափսոսում, բայց եղել է այն, ինչ եղել է։ Ոչ մեկն ապահովված չէ վնասվածքից: Արթուրը երրորդ գոտեմարտի կեսից արդեն վնասվածք ուներ, իսկ դրանից հետո 2 գոտեմարտ ևս վնասվածքով շարունակեց, որի պատճառով վնասվածքը խորացել էր, իսկ վերջին գոտեմարտը շարունակելու դեպքում կարող էր էլ ավելի լուրջ խնդիրներ առաջանալ: Կարևորը օլիմպիական խաղերի վարկանիշն էր, որն արդեն կա, իսկ հիմա մեր ամբողջ նպատակը օլիմպիական խաղերին նախապատրաստվելն է ու կորցրածը հետ բերելը»,- ասաց նա:
Նշենք, որ Ղազախստանում անցկացված աշխարհի առաջնությունում 97 կգ քաշային կարգում Արթուր Ալեքսանյանն արժանացավ փոխչեմպիոնի կոչմանն ու 2020թ․ Տոկիոյի օլիմպիական խաղերի ուղեգիր վաստակեց:
Նա կողոսկրի վնասվածքի պատճառով չմասնակցեց եզրափակիչ գոտեմարտին։
