Տպել
Սթրեսը, քրոնիկ հոգնածությունը, առողջարար սննդի ու առհասարակ օրգանիզմին անհրաժեշտ սննդանյութերի պակասը դառնում են իմունիտետի անկման հիմնական պատճառ, ինչն էլ իր հերթին նպաստում է հարբուխի առաջացմանը, քնկոտությանը, ուժի պակասին, ինչպես նաև հերպեսի առաջացմանը։ Սննդակարգի վերանայումը կօգնի կարճ ժամանակահատվածում զգալի արդյունքի հասնել։
Վիտամին С
Հակավիրուսային այդ վիտամինն արյան սպիտակ տարրերին էներգիա է տալիս, որպեսզի վերջիններս ոչնչացնեն մանրէներն ու վարակները։ Մտապահեք ոսկե կանոնը․
այն պահերին, երբ հեշտ է հիվանդանալը՝ եթե շատ եք հոգնել, շփվել եք հիվանդ մարդու հետ կամ զգում եք, որ ուր որ է հիվանդանալու եք, որքան հնարավոր է արագ օրգանիզմում բարձրացրեք վիտամին C-ի մակարդակը։
Աղբյուրը։ Վիտամին C-ն խիստ զգայուն է բարձր ջերմաստիճանի հանդեպ և պարունակվում է միայն հում բանջարեղնում ու մրգերում, որոնք ենթարկված չեն ջերմային մշակման։ Հատկապես մեծ է քանակը կիվիի, սև հաղարջի, ելակի, բալի, ցիտրուսային մրգերի, քաղցր և կծու պղպեղի, մաղադանոսի, սպանախի, կաղամբի և բողկի մեջ։ Բացի այդ, վիտամին C-ի քանակը պատշաճ մակարդակում օգնում են
պահել՝ կանաչ թեյը, կարմիր գինին, դառը շոկոլադը, ինչպես նաև կարմիր կամ սև գույնի հատապտուղները:
Վիտամին D
Վիտամին D-ն ամրացնում է ոսկորները՝ նպաստելով կալցիումի յուրացմանը։ Այդ պատճառով էլ այն ավանդաբար օգտագործում են երեխաների ռախիտը, մեծ տարիքում՝ օստեոպորոզը կանխելու նպատակով։ Այն կանխում է կրծքագեղձի, շագանակագեղձի և ստամոքսի քաղցկեղի, ինչպես նաև դիաբետի առաջացումը։ Բացի այդ, վիտամինը պատասխանատու է արյան սպիտակ գնդիկների բնականոն
աշխատանքի համար։
Աղբյուրը։ Սննդի մեջ քիչ է վիտամին D-ի քանակը։ Այն օրգանիզմում կուտակվում է արևի ճառագայթների ներգործության շնորհիվ։ Բավական է 15 րոպե անցկացնել արևի տակ գոնե օրը երկու անգամ։ Գարնանը և ամռանը դժվար չէ այդ անելը, իսկ այ ձմռանը հարկավոր է դեղատնից վիտամին գնել և խմել։
Մագնեզիում
Մագնեզիումը հանգստացնում է։ Սթրեսային իրավիճակում՝ լինի անակնկալ, վատ լուր, թե հոգնածություն, մենք կենտրոնացնում ենք ուշադրությունն ու էներգիան, որպեսզի լուծում գտնենք։ Արդյունքում օրգանիզմն սպառում է մագնեզիումի պաշարը, որպեսզի
վերադարձնի հավասարակշռությունը։ Անհանգստության բացասական հետևանքները նվազեցնելու նպատակով կարևոր է սննդի միջոցով ստանալ այս նյութը։
Աղբյուրը։ Մագնեզիումով հարուստ է առաջին հերթին հանքային ջուրը (մեկ լիտրում մոտ 100մգ), որով հնարավոր է թեյ և ապուրներ պատրաստել։ Պարունակվում է նաև լոբազգիների, հնդկաձավարի, շագանակագույն և վայրի բրնձի, բանջարեղենի,
ծովամթերքի, հունական ընկույզի, նշի, պնդուկի և սոյայի մեջ։
Ցինկ
Ամենակարևոր հանքանյութը վարակների դեպ պայքարելու համար։ Այն անհրաժեշտ է մեր օրգանիզմի երկու հիմնական պաշտպանների՝ հակամարմինների և արյան սպիտակ գնդիկների արտադրման համար։ Օրվա անհրաժեշտ քանակը 15 մգ-ն է։ Հաճախ ցինկի պակաս են ունենում ծեր մարդիկ, ում օրգանիզմում այն վատ է յուրացվում։
Աղբյուրը։ Պարունակվում է կենդանական ճարպում՝ սպիտակ և կարմիր մսի, ձկան, ձվի, ծովամթերքների և խեցգետինների մեջ։ Ցինկը վատ է յուրացվում բուսական սննդի միջից։ Այդ պատճառով էլ բուսակերներին խորհուրդ է տրվում տարին երկու անգամ արյան նմուշ հանձնել օրգանիզմում ցինկի մակարդակն ստուգելու համար։
