Տպել
Shabat.am-ը շարունակում է իր «Շաբաթի հյուրը» հարցազրույցների շարքը: Այս շաբաթ զրուցել ենք Երևանի Կենտրոն, Նորք-Մարաշ, Էրեբունի, Նուբարաշեն վարչական շրջաններն ընդգրկող թիվ 4 ընտրատարածքում ռեյտինգային ցուցակով առաջադրված, «Ծառուկյան» դաշինքի անդամ Արարատ Զուրաբյանի հետ:
-Պարոն Զուրաբյան, բոլորը գիտեն Ձեր և Վանո Սիրադեղյանի ընկերության մասին, երբ եք վերջին անգամ շփվել նրա հետ, կպատասխանեք անկեղծ բոլորին հետաքրքրող հարցին՝ որտե՞ղ է Վանոն:
-Վանո Սիրադեղյանը բացառիկ անձնավորություն է, հպարտությամբ պետք է ասեմ՝ իսկապես շատ երկար ճանապարհ ենք անցել միասին: Պատիվ եմ ունեցել ճանաչել, ընկերություն անել նրա հետ: Իմ ունեցած տեղեկություններով՝ արտերկրում է, թե որտե՞ղ՝ հստակ չգիտեմ:
-Ե՞րբ եմ վերջին անգամ տեսել… գիտեք՝ բարդ հարց եք տալիս, շատ վաղուց: Երկար ժամանակ է Վանո Սիրադեղյանին չեմ տեսել՝ կարոտել եմ, ինչպես այն մարդիկ, ովքեր նրան համարում են իրենց ընկերը, զինակիցը: Մարդ, ով պետք է լիներ Հայաստանում, ով անհրաժեշտ է մեր երկրին: Նա սիրում է Հայաստանը, ինչպես ինքն է ասել. «Հայաստանը երկիր է, որը պետք է մանրամասն սիրել»:
– Ձեր՝ թաղապետ եղած ժամանակ Օպերայի տարածքում ձեռք բերեցիք մամուլում շատ քննարկված սրճարանը: Արդյո՞ք իշխանության եղած ժամանակ նաև բիզնեսով եք զբաղվել:
– 1990-ականների սկզբներին Հայաստում նոր-նոր գոյանում էր մասնավոր սեփականությունը, իմ ընտանիքի անդամները դիմել էին թաղապետարան, քանի որ կարգն էր այդպես, և թույլատվություն էին ստացել: Այդ ժամանակ այնտեղ մեկ-երկու սրճարան կար: Մենք ապրում էինք մի հասարակությունում, որն անցումային էր, խորհրդային միությունը փլուզվել էր, պետական աշխատողի աշխատավարձը կարող էր բավարարել տարվա մեջ մեկ անգամ կոստյում գնելուն: Սա էր իրավիճակը, եթե որևէ դատապարտելի բան կա, մեղքս ընդունում եմ: Վատ է համեմատություններ անելը, բայց եթե համեմատենք, կհասկանանք թե ինչպիսին ենք եղել մենք, ինչպիսին են այն մարդիկ, ովքեր այսօր են: Կարծում եմ՝ չես կարող դատապարտել ընտանիքիդ, որևէ բանով զբաղվելու, միայն թե նրա համար, որ դու պաշտոն ես զբաղեցնում:
– Եղել եք ՀՀՇ-ական, այնուհետև Ազատ դեմոկրատների ներկայացուցիչ (2012թ.), իսկ հիմա Ծառուկյանի կողքին եք, արդյոք ձեր ընտրողները կգան ձեր հետևից այսքան թիմեր՝ այսինքն գաղափարախոսություն փոխելու պարագայում:
-Գաղափարախոսությունն ընդհանրապես չի փոխվել, ես ազատական գաղափարների կրողն եմ: Դաշինքները հենց նրա համար են, որպեսզի միավորեն տարբեր քաղաքական ուժեր՝ ընդհանուր ծրագրերի շուրջ, որը և տեղի է ունեցել: Ունեմ որոշակի տարաձայնություններ «Ծառուկյան» դաշինքի կազմում գտնվող այլ քաղաքական ուժերի մոտեցումների հետ և դա բնական է, եթե բոլորս ունենայինք նույն հայացքները, ապա կլինեինք մեկ կուսակցության անդամ: Մի բան պետք է արձանագրել՝ համոզված եմ, որ իմ ընտրողները կգան, որովհետև ես գրեթե 30 տարի քաղաքականության մեջ եմ և ունեմ բազմաթիվ համախոհներ, ընկերներ: Կենտրոն համայանքում չկա այնպիսի հատված, որտեղ չունենամ կողմնակիցներ: Վառ ապացույցն է եղել տարբեր ժամանակներում անցկացված ընտրությունները:
Հիմա ընտրություններին մասնակցում է 9 քաղաքական ուժ, որից 4-ը դաշինք: Ցանկացած ՀՀ քաղաքացի գիտակցում է, որ երկու քաղաքական ուժ՝ իշխող Հանրապետականն ու «Ծառուկյան» դաշինքն են, որոնք խնդիր չեն դրել հաղթահարելու 5 կամ 7%-ի շեմը, այլ նպատակն է՝ մեծամասնություն կազմել:
Սերժ Սարգսյանի ասած՝ գաղջ մթնոլորտի մեղավորը միայն Հանրապետականները չեն, այլ՝ այն բոլոր մարդիկ են, ովքեր այսօր զբաղված են պահպանելու այդ Հանրապետականի իշխանությունը և նրանք բավականին շատ են:
-Արդյո՞ք պատրաստ եք ընտրություններից հետո դիմել փողոցային պայքարի հաշվի առնելով, որ իշխանությունները դիմում են ցանկացած քայլի մեծ թվով ձայներ ապահովելու համար:
-Ես չեմ ցանկանա խոսել հետընտրական շրջանից, բայց եթե լինեն այնպիսի իրավախախտումներ, ապօրինություններ, որոնց պարագայում լռելը և ոտքի չկանգնելն անհնարին է, կարծում եմ՝ ի թիվս մյուս քաղաքական ուժերի և անհատների, բնականաբար կմասնակցենք, նույնիսկ կառաջնորդենք այդ գործընթացները, որովհետև մենք ցանկանում ենք արդար ընտրություններ: Եթե որևէ մեկը բռնությամբ պահպանում է իշխանությունը, դա սահմանադրական կոպիտ խախտում է և յուրաքանչյուր քաղաքացի պարտավոր է ձայն բարձրացնել:
-Քննարկել եք, թե ո՞վ է լինելու վարչապետի Ձեր թեկնածուն, արդյոք Գագիկ Ծառուկյանին եք տեսնում վարչապետի պաշտոնում:
-Նման քննարկման մասնակից չեմ եղել, և տեղյակ էլ չեմ՝ քննարկումներ եղել են, թե՞ ոչ: Եթե հաշվի առնենք, որ «Ծառուկյան» դաշինքի ներկայացուցիչները ԲՀԿ-ի մասն են կազմում, ապա այստեղ որոշում կայացնելու առումով էլ այդ մարդիկ վաստակել են այդ իրավունքը: Եթե քննարկումներ լինեն, ես իմ տեսակետը կարտահայտեմ: Չեմ կարծում, թե դա ամենաբարդ գործն է՝ որոշելու, թե ինչպիսի՞ կառավարություն պետք է լինի:
«Ծառուկյան» դաշինքում կան այնպիսի մարդիկ, ովքեր կարող են լուրջ պետական բեռ վերցնել իրենց ուսերին: Անհրաժեշտության դեպքում անգամ արտերկրից կարող են հրավիրվել մարդիկ, որոնք այս կամ այն ոլորտը կարող են համակարգել կամ խորհրդատվություն իրականացնել և այլն: Տա Աստված գանք այն արդյունքին , որն ակնկալում ենք, և այդ ժամանակ չենք հապաղի ու ճիշտ լուծում կգտնենք:
-Համամի՞տ եք, որ «Ծառուկյան» դաշինքում շատ են ՀՀԿ-ից խռովածները: Շատերը պնդում են՝ ՀՀԿ-ում տեղ չի եղել այդ պատճառով Ձեր դաշինքով են առաջադրվել:
-Ձևակերպումն այնքան էլ ճիշտ չէ, քանի որ դա կարող են անել նաև Հանրապետականները, բայց տվյալ պարագայում, եթե հետ նայենք՝ կարող եմ ասել, որ Հանրապետականում հավաքվել են ՀՀՇ-ից դժգոհները, կամ մեր կուսակցությունում տեղ չգտածները: Լինում են նաև հակառակ դեպքերը:
– Իրականում ինչպե՞ս եք գնահատում մյուս դաշինքների շանսերը՝ ՕՐՕ, ԵԼՔ, Կոնգրես-ՀԺԿ:
-Այսօր խորհրդարան անցնելու հնարավորություն ունեն «Ծառուկյան» դաշինքը և Հանրապետականները, մյուսների հնարավորությունները շատ սահմանափակ են և գրեթե բոլորն էլ եզրագծի վրա են: Եթե կցանականայի, որ Ելք դաշինքն անցներ, բայց երբ հիշում են Գյումրիի ՏԻՄ ընտրությունները, որտեղ «Քաղաքացիական պայմանագիր»-ը շատ քիչ թվով ձայն էր ստացել, ապա գտնում եմ, որ այնքան էլ լավ չի վիճակը: Իհարկե երկար ժամանակ է քաղաքական գործունեությամբ են զբաղվում, բայց կարծում եմ կկարողանան գտնել ելքը՝ ձայներ ապահովելու համար: Սա վերաբերվում է թե՛ Կոնգրես-ՀԺԿ դաշինքին, թե՛ Ելք-ին, թե՛ ՕՐՕ-ին, հանրության առջև քննությունը կհանձնեն թե՞ ոչ, սա լուրջ խնդիր է:
Կան կուսակցություններ, որոնք գրեթե հնարավորություն չունեն անցնելու, կան այնպիսիք, որոնց սիրենք, թե՞ ոչ՝ հայտնվելու են պառլամենտում:
Ամբողջությամբ՝ shabat.am
