«Համահայկական նվագախումբ»-ը համերգով կոգեկոչի Հայոց ցեղասպանության զոհերի հիշատակը

Աշխարհի տարբեր երկրներից Երևանում հավաքված հայ երաժիշտները «Համահայկական նվագախումբ» նախագծի շրջանակներում ապրիլի 24-ին Ա. Սպենդիարյանի անվան Օպերայի եւ բալետի ազգային ակադեմիական թատրոնում  կայանալիք համերգին կկատարեն բացառապես հայ կոմպոզիտորների ստեղծագործություններ` ոգեկոչելով Հայոց ցեղասպանության զոհերի հիշատակը:

ՀՀ մշակույթի նախարար Արմեն Ամիրյանը լրագրողների հետ զրույցում նշեց, որ «Համահայկական նվագախումբ» նախագծի շրջանակներում բացի ապրիլի 24-ի համերգից, այլ համերգներ եւս նախատեսվում են:

«Նախագծի շրջանակներում հրավիրված ցանկացած երաժիշտ լիցքավորված հայկականությամբ, հայկական մտածողությամբ  կհեռանա Հայաստանից` իր հետ տանելով իր վերագտած հայկական գենը»,- ասաց Ամիրյանը:

Նրա խոսքով` հայաշատ տարբեր գաղթօջախներում առաջիկայում նախատեսվում են «Համահայկական նվագախումբ»-ի համերգները: Մտահաղացումն իրականություն դարձնելու համար հովանավորներ են անհրաժեշտ:

«Արդեն իսկ առաջին ծիծեռնակը կա եւ հաջող բանակցություններից հետո մենք հերթական համերգի մասին կհայտարարենք շուտով»,- ասաց նա:

Հատուկ «Համահայկական նվագախումբ» նախագծի համար ՀՀ մշակույթի նախարարության պատվերով համաշխարհային ճանաչում ունեցող կոմպոզիտոր Տիգրան Մանսուրյանը գրել է նոր ստեղծագործություն` «Պոեմ հաղթանակի» վերնագրով:

«Համահայկական նվագախումբ» նախագիծը իրականություն է դարձել ՀՀ Նախագահ Սերժ Սարգսյանի աջակցությամբ եւ Մշակույթի նախարարության նախաձեռնությամբ:

Նախագծին մասնակցում է հայազգի 90 պրոֆեսիոնալ երաժիշտ, որոնցից շուրջ 70-ը աշխարհի 20 երկրներից:

Համահայկական նվագախմբի հիմքում ընկած հիմնական գաղափարը հայ ժողովրդի միասնականությունն է:

Ստորև ներկայացնում ենք նաև asekose.am-ի տեսանյութը.