Թուրքիայում արբանյակային հեռարձակումից հանվել են քրդական ալիքները

Թուրքիայի ռադիոյի և հեռուստատեսության բարձրագույն խորհուրդը (RTÜK) Հյուսիսային Իրաքի քրդական ինքնավարությունում անցկացված անկախության հանրաքվեից հետո որոշում է կայացրել TÜRKSAT արբանյակային հեռարձակումից հանել քրդական հեռուստաալիքները: Ինչպես հաղորդում է «Արմենպրես»-ը, այս մասին հայտնում է թուրքական «Անադոլու» գործակալությունը:

Մասնավորապես դադարեցվել են Հյուսիսային Իրաքի քրդական ինքնավարությունում գործող Rudaw TV-ն, WAAR TV-ն և K24 TV-ն:

Իրաքյան Քրդստանում անցկացված հանրաքվեի նախնական արդյունքների հաշվարկող մասնակիցների ավելի քան 93, 29 տոկոսը «այո» է ասել անկախությանը:

Թուրքիայի նախագահ Ռեջեփ Թայիփ Էրդողանը հանրաքվեի օրը հանդես էր եկել հայտարարությամբ՝ նշելով, որ անկախության հանրաքվեից չհրաժարվելու պարագայում իրենք պատրաստ են փակել սահմանը Հյուսիսային Իրաքի քրդական ինքնավարության հետ: