Տպել
Երևանցիները մեկ շաբաթվա ընթացքում կարող են սովորական լամպերն անվճար փոխանակել LED լուսադիոդային լամպերով «Նոր լույսի ներքո» ակցիայի շրջանակում։
«Այսօր մենք տեղեկատվական արշավ ենք սկսում էներգախնայող տեխնոլոգիաների մասին։ Ակցիայի նպատակն է իրազեկել սովորական լամպերը LED լամպերով փոխանակելու հնարավորության մասին, ինչի շնորհիվ կարելի է 8 անգամ տնտեսել էլեկտրաէներգիայի ծախսը», – երկուշաբթի լրագրողներին ասաց ՄԱԿ–ի Զարգացման ծրագրի Կլիմայի փոփոխությունների ծրագրի համակարգող Դիանա Հարությունյանը։
«Նոր լույսի ներքո» ակցիան անցկացվում է Երևանում հոկտեմբերի 23–27–ը ՄԱԿ–ի Զարգացման ծրագրի և Գլոբալ էկոլոգիական ֆոնդի «Քաղաքային կանաչ լուսավորություն» ծրագրի շրջանակում, որն իրականացվում է ՀՀ բնապահպանության նախարարության և Երևանի քաղաքապետարանի հետ համատեղ։
Ցանկացողները կարող են սովորական լամպերը փոխանակել հատուկ տաղավարներում, որոնք հոկտեմբերի 23–25–ը գործելու են Հյուսիսային պողոտայում և մետրոյի «Երիտասարդական» կայարանի հարևանությամբ, իսկ հոկտեմբերի 26–ին և 27–ին` Գարեգին Նժդեհի հրապարակում և Նոր Նորքի 2–րդ զանգվածում։ Տաղավարները գործելու են ժամը 12։00–ից մինչև 20։00–ն։
Հարությունյանի խոսքով, ակցիայի շրջանակում նախատեսվում է փոխանակել 2800 լամպ։
