Տպել
Եթե նախկինում ՀՀ տարածքը թերագնահատվել էր սեյսմիկ վտանգի տեսակետից, Սպիտակի երկրաշարժից հետո վերանայվեց այդ ամենը,-լրագրողների հետ հանդիպման ժամանակ ասաց ՀՀ արտակարգ իրավիճակների նախարարության «Սեյսմիկ պաշտպանության արևմտյան ծառայություն» ՊՈԱԿ-ի կառուցվածքների սեյսմակայունության կենտրոնի պետ Զավեն Խլղաթյանը:
Նրա փոխանցմամբ՝ Երևանը գրունտների տիպերի առումով կարելի է բաժանել երեք հիմնական խմբի.ուժեղ կամ ժայռային, որը մոտավորապես Նորքի զանգվածի հատվածում է, երկրորդ կարգի գրունտները քաղաքի կենտրոնում են, երրորդը՝ Աէրացիայի տարածքն է:
-Ճապոնացի մասնագետների դիտարկմամբ՝ ուժեղ երկրաշարժի դեպքում Երևանի շենքերի 40 տոկոսը մասնակի կամ ընդհանրապես կփլուզվի:
Ճարտարապետ Սարհատ Պետրոսյանի խոսքով՝ այսօր պահանջներն ավելի խիստ են:
-Նոր կառուցված շենքերն ավելի սեյսմակայուն են, քան խորհրդային ժամանակահատվածում կառուցվածները, սակայն շատ խիտ են և երկրաշարժի դեպքում անգամ շտապօգնության համար դժվարություններ են լինելու,-նկատեց ճարտարապետը:
ՀՀ ԿԱ քաղաքաշինության պետական կոմիտեի շինարարության եւ գիտատեխնիկական նորմավորման վարչության խորհրդական Ալեքսանդր Մովսիսյանն էլ հայտնեց, որ ներկայումս Հայաստանը գտնվում է միջազգային պայմաններին տիրապետող սեյսմակայուն շինարարության, նորմատիվա-տեխնիկական դաշտում: «Սպիտակի երկրաշարժից հետո մենք դասեր քաղեցինք և 1995 թ-ից հետո այդ դաշտը կատարելագործվում է»,- ընդգծեց Ալեքսանդր Մովսիսյանը:
Անի Կարապետյան
asekose.am
