Տպել
Երկրորդ տարին անընդմեջ ավանդական «Ղափաման» թբիլիսյան Սուրբ Գևորգ հայկական եկեղեցու բակ է բերում հայերին, վրացիներին նաև քաղաքի հյուրերին:
Հայկական ավանդական «Ղափաման» տարեցտարկ Վրաստանում ավելի շատ երկրպագուներ է ձեռք բերում, Sputnik Արմենիայի թղթակցի հետ զրույցում ասաց Հայ առաքելական եկեղեցու Վիրահայոց թեմի մամուլի քարտուղար Սուսաննա Խաչատրյանը:
«Ղափամայի» 1-ին ավանդական փառատոնը Վրաստանում կայացել է 2016թ.-ին: «Ղափաման» բրնձով, չրերով ու մեղրով լցոնած դդում է: Այս համեղ ազգային ուտեստը մեր նախնիները պատրաստում էին տոն օրերին՝ Ամանորին, հարսանիքներին:
«Ղափամայի» փառատոնը Թբիլիսիի Սուրբ Գևորգ եկեղեցու բակում
«Արդեն 2-րդ տարին է, որ մենք կազմակերպում ենք նման փառատոն, ամեն ինչ տանում է դրա ավանդական դառնալուն: Նմանատիպ փառատոնները կարևոր են, որովհետև ներկայացնում ենք մեր խոհանցոը՝ հարուստ մեր մշակույթի կարևոր բաղկացուցիչը: Նման փառատոնները օգնում են երիտասարդներին իմանալ ու պահպանել ազգային ավանդույթնորն ու սովորույթները»,-ասաց Խաչատրյանը:
Նրա խոսքով՝ Վրաստանում «Շուշանիկ» կանանց միությունը փորձում է պահպանել ու տոնել ավանդական տոները: Օրինակ՝ նշում են Բարեկենդանը, կազմակերպում են գաթայի, տոլմայի և այլ փառատոններ: Նման փառատոնների անցկացումը կարևորում են նաև Վրաստանում Հայաստանի դեսպանատանը: «Դեսպանատունը ևս աջակցում և կարևորում է նման միջոցառումներին»,-ասաց դեսպանատան ներկայացուցիչը՝ Հարություն Հայրապետյանը:
Իր հերթին Վրաստանում Հայաստանի նորանշանակ դեսպան Ռուբեն Սադոյանը հայ համայնքի հետ հանդիպման ժամանակ պատրաստակամություն է հայտնել օգնել նրանց բոլոր նախաձեռնություններում: Համայնքը, նրա խոսքով, ամենակարևոր կամուրջն է հայ-վրացական հարաբերությունների կառուցման հարցում:
Հիշեցնենք, որ ՀՀ ԱԺ նախկին պատգամավոր Ռուբեն Սադոյանը ՀՀ նախագահի հրամանով հոկտեմբերի 31-ին նշանակվել է Վրաստանում Հայաստանի արտակարգ և լիազոր դեսպան:
