Տպել
«Մանչեսթեր Յունայթեդի» գլխավոր մարզիչ Ժոզե Մոուրինյոն մեկնաբանել է թիմի կիսապաշտպան Հենրիխ Մխիթարյանի բացակայությունը «Սթոք Սիթիի» հետ խաղի հայտացուցակում:
«Ես կխաբեի, եթե ասեի, թե դա զուտ տակտիկական որոշում է: Պարզապես ընտրվել են այն խաղացողները, որոնք ներկա պահին, ինչպես մեզ հայտնի է, հարյուր տոկոսով մտքերով «Մանչեսթեր Յունայթեդում» են: Երբ ապագայի հետ կապված կասկածներ չկան: Չեմ կարծում, որ ֆուտբոլիստին հեշտ է խաղալ, երբ նրա ապագայի հետ կապված կասկածներ կան:
Դա լրացուցիչ ճնշում է խաղացողի վրա, որը նրան պետք չէ: Ենթադրում եմ, որ թե Մխիթարյանի, թե մեր համար ավելի լավ է նրան հեռու պահել այս ամենից, քանի դեռ օդում կասկածներ են պտտվում», ասել է պորտուգալացին: Ինչպես հայտնում են բրիտանական լրատվամիջոցները, մեծ հավանականությամբ, Մխիթարյանը մոտ օրերս կհեռանա «Յունայթեդից»: Կան լուրեր, որ նրան կփոխանակեն «Արսենալի» կիսապաշտպան Ալեքսիս Սանչեսի հետ, որին ձեռք բերելուց հրաժարվեց «Մանչեսթեր Սիթին»:
Ուշագրավ է, որ Սանչեսը նույնպես հայտավորված չէր «Արսենալի» վերջին խաղում՝ «Բորնմութի» հետ (1:2): Վենգերը նրան չէր խաղացրել գրեթե նույն հիմնավորմամբ, ինչ Մոուրինյոն՝ Մխիթարյանի դեպքում:
