Տպել
Գորտեր, թութակ, ձկների 20 տեսակ և այլ կենդանիներ․ բոլորը մի հարկի տակ ապրում են Վահան Հակոբյանի հետ։
Կարելի՞ է տանը հարյուրավոր ձկներ պահել, հոգ տանել դրանց մասին, ամեն ինչ անել, որպեսզի ջրային կենդանիներն իրենց զգան ինչպես տանը։ Sputnik Արմենիայի թղթակիցները հյուրընկալվել էին ակվարիումների մասնագետին՝ այս հարցերի պատասխանները ստանալու համար։
Այսօր ակվարիումիստիկան Վահան Հակոբյանի կյանքի մի մասն է։ Նրա խոհանոցը հսկայական ակվարիում է հիշեցնում․ տասնյակ ակվարիումներ, բազմաթիվ ձկներ, խեցգետիններ, որոնք իրենց հիանալի են զգում։
Հակոբյանը վստահ է` որպեսզի ակվարիումային բիզնեսը բարգավաճի, պետք է սիրել այդ գործը։
«Ակվարիումիստիկան միշտ իմ կյանքի մի մասն է եղել, ես մանկուց ձկներ եմ պահել։ Բայց պրոֆեսիոնալ ակվարիումիստիկայով զբաղվում եմ 30 տարի։ Ես ինձ բնության մի մասնիկն եմ համարում, ուստի կենդանիները միշտ հետաքրքրել են ինձ»,= պատմեց Վահանը։
Նա արդեն հիանալի գիտի, թե ինչպիսի կեր է պետք կոնկրետ ձկնիկին․ մեկը չոր կեր է սիրում, մյուսն էլ սնվում է որդերով։
«Ես մոտավորապես 20 տեսակի ձկներ ունեմ։ Մի մասին պահում եմ ինձ համար, մյուս մասը բուծում եմ։ Ի դեպ, կան տեսակներ, որոնց բուծելն անհնար է, բայց ես ամեն դեպքում փորձում եմ»,= նշեց ակվարիումիստը։
Նրա խոսքով՝ ձկների մի մասը ճանաչում են իրենց տիրոջը շարժումից, սիլուետից, ձեռքերից։
Մենք նույնպես փորձեցինք կերակրել ձկներին և հասկացանք, որ ջրային կենդանիները մի քիչ վախեցան մեզանից։ Նշանակում է՝ այդ տեսությունը ճիշտ է, որ ձուկը ճանաչում է իր տիրոջը։
Ինչպես պատմեց Sputnik Արմենիայի զրուցակիցը, ակվարիումիստիկայով զբաղվում են տարածաշրջանի բոլոր երկրները։ Բայց նախկին ԽՍՀՄ երկրների շարքում ամենաուժեղը Ռուսաստանն ու Ուկրաինան են։ Նա հուսով է, որ Հայաստանը կմտնի ԱՊՀ երկրների առաջատարների հնգյակի մեջ, որտեղ պրոֆեսիոնալ մակարդակով ձուկ են բուծում։
Այսօր Վահան Հակոբյանն ամեն օր հոգ է տանում իր ձկների և իր բնակարանի այլ բնակիչների մասին, որպեսզի նրանք ոչնչի կարիք չունենան։ Նա արդեն ծանոթ է յուրաքանչյուրի բնավորությանը և գիտի՝ ինչի կարիք ունեն։
Վահան Հակոբյանի բնակարանի արտասովոր բնակիչները
