Տպել
Մի քանի տարվա դադարից հետո ՀՀ մշակույթի վաստակավոր գործիչ հաղորդավար Ավետ Բարսեղյանը «Գոյ» թատրոնում «Իմ լռություն» խորագրով երեկոյի ընթացքում կրկին իր հանդիսատեսին բացահայտեց այն հույզերն ու մտքերը, որոնք տարիների ընթացքում կուտակվել և վերածվել են բանաստեղծությունների: «Արմենպրես լայֆ»-ի հետ զրույցում Ավետ Բարսեղյանը նշեց, որ, ինչպես ամեն անգամ, «Գոյ» թատրոնում իր սիրտը տրոփում է, ինչպես առաջին անգամ:
«Այսօր շատերը կտեսնեն, թե որքան խոցելի, անպաշտպան և ոչ մեծամիտ մարդ եմ ես: Դա է գաղտնիքը: Տպավորությունն այն է, որ ինձ ոչինչ չի կարող խոցել, բայց ամեն մի սովորական բանից, սկսած հայացքից, խոսքից խոցվում եմ, ինչպես բոլոր մարդիկ: Այս անգամ էլ «Լռություն» խորագրով եմ ներկայանում, քանի որ լռության մեջ ավելի շատ եմ խոսք գտնում, քան խոսքերի հոսքի մեջ՝ իմաստ: Իսկ լռությունը այն խոռոչն է, որը բերում է շատ իմաստ»,- ասաց Ավետը:
«Արմենպրես»-ի փոխանցմամբ, երեկոյի ընթացքում հաղորդավարն ընթերցեց իր ինչպես նոր, այնպես էլ հին ստեղծագործություններից: «Ստեղծագործական երեկոյի ընթացքում բացահայտելու ենք այն գաղտնի աշխարհը, որը ես ունեմ: Իմ ռուսերեն և հայերեն ստեղծագործություններում դահլիճում մերկանալու եմ մտքերով, հոգով ու հասկանալու, թե ինչ է կուտակվել: Միշտ ասել եմ, որ ի տարբերություն այլ աշխատանքային գործունեության, այս երեկոն ինձ համար է: Այս ձևաչափն առաջին հերթին ինձ համար է կարևոր, որ լռության մեջ գտնեմ ինձ: Ես խոսքաշատ ոլորտում եմ աշխատում և ինքս էլ շատ խոսքաշատ եմ, դրա համար լռությունը առաջին հերթին ինձ է պետք»,- ավելացրեց Ավետը:
