Տպել
Բլոգեր Ալեքսանդր Լապշինը օրեր անց Ստրասբուրգում Եվրոպայի խորհրդի խորհրդարանական վեհաժողովի նիստերից մեկում կխոսի Ադրբեջանի կողմից իր իրավունքների խախտման վերաբերյալ: Այս մասին բլոգերը հայտարարեց Երևանում լրագրողների հետ մամուլի ասուլիսի ժամանակ:
«Կխոսեմ այն մասին, թե ինչպես են ինձ 7 ամիս պահել մեկուսարանում, որը մարդու իրավունքների խախտում է, ինչպես են ինձ կտրել արտաքին աշխարհի հետ կապի հնարավորությունից, ինչպես են ծաղրել: Իսկ վերջին օրը՝ սեպտեմբերի 10-ին, երբ մայրիկիս ծննդյան օրն էր, ծեծել են, կոտրել են ատամներս, կողոսկրս, իսկ երբ անգիտակից վիճակում էի, կոկորդիս պարան էին անցկացրել ու կախել զուգարանում, որ հետո ներկայացնեն, թե իբր կախվել եմ: Կարծում եմ՝ հատուկ էին մայրիկիս ծննդյան օրը ընտրել»,- նշեց Լապշինը:
Բլոգերի խոսքով՝ երբ Ադրբեջանում էր, հասկանում էր, որ գտնվում է տոտալիտար երկրում, որը կառավարվում է կլանների կողմից, իսկ իրեն ցանկանում են օգտագործել ներքին խնդիրները լուծելու համար:
«Նրանք ցանկանում էին անկիրթ բնակչությանը ցույց տալ, թե Իլհամ Ալիևն ուժեղ առաջնորդ է, կարող է իրեն թույլ տալ չհարգել Ռուսաստանի, Իսրայելի և Եվրոպական միության կարծիքը»,- ասաց բլոգերը:
Ադրբեջանի թույլ տված անօրինությունների վերաբերյալ հայցն արդեն 1.5 ամիս է՝ Մարդու իրավունքների եվրոպական դատարանում է: Ֆրանսիացի փաստաբանները բլոգերին տեղեկացրել են, որ այն արդեն դատարանի կողմից վերցվել է քննության, իսկ գործընթացը կարող է 1-2 տարի տևել:
«Մենք մեղադրանք ենք ներկայացրել Բաքվի բանտում իմ հանդեպ սպանության փորձի, իմ իրավունքների, արտահանձնման իրավունքի խախտման, ինչպես նաև ազատությունից ինձ ապօրինաբար զրկելու հարցերով»,– հայտնեց Ալեքսանդր Լապշինը:
Նրա կարծիքով՝ ադրբեջանցիները ֆինանսական ու մարդկային ռեսուրս են ծախսում ու ամենօրյա ռեժիմով իր հետ կատարվող ամեն ինչ մոնիտորինգի ենթարկում:
«Ես վստահ եմ, որ նրանք մոնիտորինգ են անելու այն ամենը, ինչ այստեղ կասեմ՝ ծախսելով ֆինանսական ու քաղաքական ռեսուրսներ: Ինչքան շատ ռեսուրս վատնեն իմ դեմ պայքարում, ավելի քիչ զենք կգնեն»,- կես կատակ, կես լուրջ ասաց բլոգերը: Հարցին ի պատասխան, թե չի վախենում, որ ադրբեջանցիները կարող են իր հետ հաշվեհարդար տեսնել, Լապշինն ասաց՝ չի բացառում ռիսկը, որ որևէ երկրում կարող են հարձակվել իր վրա, դանակով հարվածել, այդ իսկ պատճառով փորձում է զգուշավոր լինել:
Բլոգերը նշեց, որ այս անգամ չի հասցնի այցելել Արցախ, քանի որ երեք օրից պիտի մեկնի Ստրասբուրգ, սակայն հաջորդ անգամ անպայման կլինի գեղատեսիլ Արցախում: «Ես հաջորդ անգամ կգնամ Արցախ, ու ցույց կտամ, որ նրանք մեզ վախեցնել չեն կարող»,- հավելեց Ալեքսանդր Լապշինը:
Լապշինը Հայաստանում է «InTour Expo» և «SportWay» ցուցահանդեսներին մասնակցելու համար: Այստեղ նա կխոսի Հայաստան ու այլ երկրներ ճամփորդությունների մասին, թե ինչպես գնել էժան ավիատոմսեր, ինչպես լինել ազատ և վայելել ճամփորդությունը:
