Տպել
«Sports.ru»-ն առանձնացրել է Հենրիխ Մխիթարյանի հետ «Альфа-Банк»-ի կազմակերպած հետաքրքիր հարցազրույցից հատվածներ:
– Դուք տիրապետում եք 6 լեզվի. ասեք մարդկանց, թե ինչպե՞ս է դա հնարավոր:
– Գաղտնիք չկա: Ֆրանսիայում սովորել եմ ֆրանսերեն, Բրազիլիայում՝ պորտուգալերեն, Գերմանիայում խաղալիս էլ գերմաներեն եմ սովորել:
Ամեն ինչ պարզ է՝ սովորում եմ, շփվում, գրքեր կարդում:
– Պատմեք հետաքրքիր դեպք Յուրգեն Կլոպից:
– «Բորուսիայում» մարզվում էինք պահերի իրացման վրա, երբ նա ասաց. «Եթե խփես 6-7 գոլ, կվճարեմ 50 եվրո, եթե ոչ՝ դու կվճարես»: Ես պարտվեցի: Երկու օր անց «Ֆրանկֆուրտի» հետ գավաթային խաղ ունեինք, հաղթեցինք 2:1 հաշվով, ես դուբլ ձևակերպեցի: Խաղից հետո Կլոպն ինձ գրկեց և ասաց, որ գոհ է: Ես ասացի, որ նա վերադարձնի իմ 50 եվրոն. նա ստիպված վերադարձրեց:
– Երևանն աշխարհի լավագույն քաղա՞քն է:
– Ինձ համար ամենալավն է: Այդտեղ ապրում են իմ ընկերները, հարազատները, ընտանիքս: Այդ քաղաքն ինձ շատ ուժ է տալիս:
– Երեք վայր Հայաստանում, որտեղ պետք է այցելել:
– Առաջինը՝ Խոր Վիրապ, այնուհետև Գառնի Գեղարդ և Արցախ:
– Ձեզ դո՞ւր է գալիս «System Of A Down» խումբը:
– Ես ռոքի մեծ երկրպագու չեմ, խմբի մենակատար Սերժ Թանկյանը հայրենակիցս է, ու ինձ դուր է գալիս: Ցավոք, դեռ չենք հանդիպել:
– Լավագույն խորհուրդը, որը Ձեր հայրը տվել է:
– Նա չի հասցրել ինձ խորհուրդ տալ, քանի որ 7 տարեկան եմ եղել, երբ մահացել է: Ցավոք, այդ հասակում դեռ շատ բան չեմ հասկացել:
– Ձեր մայրիկի պատրաստած լավագույն ուտեստը:
– Միանշանակ չէ, սակայն կնշեմ խոզի միսը՝ պատրաստված ռոքֆորի սոուսով:
– Նկարագրեք Լոնդոնում Ձեր տունը:
– Երեքսենյականոց բնակարան հանգիստ շրջանում, ոչ մի արտառոց բան: Կարևորը հարմարավետ զգացողությունն է, որպեսզի հաճելի լինի տուն վերադառնալը:
– Որտեղի՞ց եք հագուստ գնում:
– Վերջին անգամ Մյունխենից: Ավստրիայում հավաքականի հետ ուսումնամարզական հավաքի ընթացքում ազատ օր ունեինք, այդ ժամանակ գնեցի:
– Ի՞նչ բրենդներ եք նախընտրում:
– Որևէ առանձնակի բրենդ չկա: Կարևորը, որ այդ շապիկը, ջինսը ինձ դուր գա:
– Ի՞նչ հագուստներ եք հագնում:
– Բրենդային, սակայն հասարակ:
– Պատմեք դեպք Իբրահիմովիչի հետ, որը ոչ ոք չգիտի:
– Մի անգամ հարցրի, թե երբ ընթրելու համար ազատ ժամանակ կունենա: Որոշեցինք այդ օրը՝ մարզումից հետո: Գնացինք հայկական ռեստորան, հայկական խորոված կերանք: Երկու օր անց «Սենտ Էտիենի» հետ խաղին Իբրան հեթ-տրիկ ձևակերպեց:
– Վերջին անգամ ե՞րբ եք մետրոյից օգտվել:
– Wow ! Երևի 15 տարի առաջ Երևանում:
– Ի՞նչ եք վարում հիմա:
– «Mercedes» GLA դասի:
– Մեքենա, որի մասին երազում եք:
– Տրակտոր՝ լավագույն մեքենան է: Կատակում եմ: «Lamborghini Aventador»:
– Չաթ ունե՞ք «Արսենալի» ֆուտբոլիստների հետ:
– Այո, «WhatsApp»-ով:
– Հետաքրքի՞ր է անցնում:
– Ամենահետաքրքիր կատակը եղել է Լակազետի կողմից, բայց գաղտնիք է, թե ինչ:
– Ի՞նչ երազանք ունեք:
– Շատ են: Ու ամեն անգամ, երբ ես հասնում եմ երազանքի, հաջորդն եմ ունենում: Ես երբեք չեմ բավարարվում ձեռք բերածով: Առաջին երազանքը լավ մարդ լինելն է, երկրորդը՝ ընտանիք, երեխաներ ունենալը: Մնացածն ինքնաբերաբար կլինի:
