Վերջին 10 օրվա ընթացքում ՀՀ-ում արձանագրվել է սնկից թունավորման 4 դեպք
Advertisement 1000 x 90

Վերջին 10 օրվա ընթացքում ՀՀ-ում արձանագրվել է սնկից թունավորման 4 դեպք

Վերջին 10 օրվա ընթացքում ՀՀ-ում արձանագրվել է սնկից թունավորման 4 դեպք՝ 7 տուժածով: Այս մասին հայտնում է ՀՀ ԱՆ Հիվանդությունների վերահսկման և կանխարգելման կենտրոնը։

Սնկից թունավորումները հիմնականում առաջանում են սնկերը չտարբերակելու կամ դրանց ոչ ճիշտ մշակման հետևանքով, արդյունքում՝թունավորում, ընդհուպ մինչև մահ: Որոշ տեսակի սնկեր սննդում կարելի է օգտագործել միայն համապատասխան խոհարարական մշակումից հետո: Իսկ թունավոր սնկերը ոչ մի դեպքում չի կարելի օգտագործել, քանի որ դրանք պարունակում են այնպիսի թունավոր նյութեր, որոնք չեն ոչնչանում խոհարարական և արտադրական մշակման ժամանակ (եփել, չորացնել, սառեցնել, մարինացնել և այլն):

Սնկից թունավորումներից խուսափելու համար խորհուրդ է տրվում.

  • Սննդում չօգտագործել անհայտ ծագման սունկ
  • Չհավաքել սունկ ճանապարհների եզրերից
  • Ուտելու և թունավոր սունկը տարբերակելու համար հիմք չընդունել նկարները քանի որ թունավոր սունկը շատ հաճախ աճում են ուտելի սնկի մոտ և կարող են արտաքին տեսքով շատ նման լինել միմյանց
  • Ուտելու և թունավոր սունկը տարբերակելու համար հիմք չընդունել ժողովրդական առասպելները, ըստ որոնց թունավոր սնկերին չեն մոտենում միջատները և այլ կենդանիները կամ եփելու ընթացքում արծաթը սևանում է և սևացնում է սնկային արգանակը
  • Չուտել հում սունկ
  • Երեխաներին չկերակրել սնկերով
  • Խորհորդ չի տրվում ստամոքս-աղիքային համակարգի խնդիրներ ունեցող մարդկանց սննդում օգտագործել սունկ
  • Սնկի հետ չօգտագործել ալկոհոլ, քանի որ այն ակտիվացնում է մի շարք թունավոր նյութեր
  • Թարմ սնկերը 1 օրից ավել չպահել նույնիսկ սառնարանային պայմաններում
  • Չզբաղվել ինքնաբուժությամբ

Սնկից առաջացած թունավորումները ունենում են սուր ընթացք: Հիվանդության առաջին նշանները կարող են ի հայտ գալ 15 րոպեից մինչև 72 ժամ է: Կլինիկական հիմնական ախտանշաններն են որովայնի կտրուկ ցավը, սրտխառնոցը, անընդհատ փսխումները, առատ քրտնարտադրությունը, թքահոսությունը, գլխապտույտը, գլխացավը, անհագ ծարավի զգացումը, հալյուտինացիաները` առանց քնկոտության, ցնորքը, գիտակցության կորուստը, դեմքի կարմրությունը, սրտխփոցը, վախի զգացումը, լյարդի ախտահարման արդյունքում` մեծացած և ցավոտ լյարդը, դեղնուկը, լյարդային կոման, երիկամների ախտահարում: Առաջին նշանների ի հայտ գալուն պես անմիջապես պետք է դիմել բժշկի, դրանից որից մեծապես կախված է թունավորման բարեհաջող ելքը:

med.news.am