Տպել
ՀՀ կենտրոնական բանկը մտադիր չէ արհեստականորեն արժեզրկել դրամը արտահանողներին սատարելու համար, Sputnik Արմենիայի հարցմանն ի պատասխան ասացին ԿԲ հասարակայնության հետ կապերի ծառայությունից։
Հաղորդագրության համաձայն` Կենտրոնական բանկի գլխավոր նպատակներն են գների կայունությունը և ֆինանսական կայունությունը, որոնց իրագործումը բխում է Հայաստանի Հանրապետության զարգացման և մեր հասարակության բարեկեցության ապահովման թե՛ կարճաժամկետ, թե՛ երկարաժամկետ նպատակներից։
«Այդ առումով Կենտրոնական բանկն իր քաղաքականության մեջ առաջնորդվում է ողջ հասարակության, այլ ոչ թե տնտեսվարողների առանձին խմբերի շահերով, օրինակ՝ դեպի ՌԴ արտահանողների կամ Թուրքիայից ներմուծողների», — գրված է հաղորդագրության մեջ։
Նշվում է, որ որքան էլ առանձին տնտեսվարողներ տուժեն կամ շահեն ֆինանսական շուկաների տարբեր զարգացումներից, ԿԲ-ն չի կարող նրանց շահը գերադասել հասարակության շահերից և տվյալ դեպքում առաջնորդվում է ու պարտավոր է առաջնորդվել Հայաստանում գների կայունության և ֆինանսական կայունության ապահովման հիմնարար նպատակների իրագործման տրամաբանությամբ։
ԿԲ-ի փոխանցմամբ` ՀՀ կենտրոնական բանկը փոխարժեքի հետ կապված երբեք և որևէ արհեստական միջամտություն չի ցուցաբերում՝ ո՛չ արժեզրկում, ո՛չ արժևորում և ո՛չ էլ կայուն պահպանում։
«ՀՀ ԿԲ-ն բազմիցս հայտարարել է դրամի լողացող փոխարժեքի մասին և հավատարիմ է մնում փոխարժեքի ազատ շուկայական ձևավորման մեխանիզմին։ ԿԲ միջամտությունն արժութային շուկային կարող է տեղի ունենալ միայն կտրուկ տատանումների ընթացքը հարթելու նպատակով, սակայն երբեք չնպատակադրելով փոխարժեքի որևէ նպատակային մակարդակ», — գրված է հաղորդագրության մեջ։
Ըստ ԿԲ-ի հաղորդման` վերջին շրջանում չի միջամտել արժութային շուկային՝ արտարժույթ վաճառելով։
Ավելի վաղ Sputnik Արմենիան զրուցել էր փորձագետների հետ Հայաստանի տնտեսության վրա ռուբլու փոխարժեքի ազդեցության, շահերի և դրամի հավանական արժեզրկման բացասական հետևանքների մասին։ Հոդվածի հետ կարելի է ծանոթանալ` անցնելով հետևյալ հղումով։
Հիշեցնենք, որ ռուբլին սկսեց անկում ապրել, երբ տեղեկություն տարածվեց, որ ԱՄՆ-ն մտադիր է Ռուսաստանի դեմ նոր սահմանափակումներ մտցնել։ Որպես պատճառ ամերիկացիներն օգտագործեցին Գլխավոր հետախուզական վարչության (ԳՀՎ) նախկին աշխատակից Սերգեյ Սկրիպալի ու նրա դուստր Յուլյայի թունավորումը բրիտանական Սոլսբերի քաղաքում։ Դրա համար մեղադրեցին Մոսկվային։
Պատժամիջոցների առաջին փաթեթը, որը սահմանափակում է կրկնակի նշանակության մթերքի մատակարարումը Ռուսաստան, կսկսի գործել օգոստոսի 22-ին։ Երկրորդ փաթեթը, որի մեջ ներառվում է ԱՄՆ-ում թռչելու «Աերոֆլոտի» արգելքը, արտահանման սահմանափակումն ու դիվանագիտական հարաբերություններ մակարդակի իջեցումը, ամերիկացիները նախատեսում են գործարկել երեք ամիս անց։
