Տպել
ՀՀ ազգային ժողովի «Ծառուկյան» խմբակցության ներկայացրած հիմնական առաջարկությունները, կապված Ընտրական օրենսգրքի բարեփոխումների փաթեթի հետ, ընդունվել են: ԱԺ-ում լրագրողների հետ ճեպազրույցում այս մասին ասաց խմբակցության անդամ Նաիրա Զոհրաբյանը:
«Մեր ներկայացրած առաջարկներից հիմնականն այն էր, որ հրաժարվեինք ռեյտինգային ընտրակարգից, որը ապաքաղաքականացրեց նախորդ ընտրությունները: Մենք գնում ենք փակ համամասնական ընտրական փուլին: Դա մեզ համար միանգամայն ընդունելի է»,- ասաց Զոհրաբյանը:
Նա չհամաձայնեց ՀՀԿ-ի այն գնահատականին, որ Ընտրական օրենսգրքի փոփոխություններն անելիս հաշվի չեն առել խմբակցությունների կարծիքը:
«Ունենք մեկ դիտարկում և վերապահում, որ պարտադիր օրենքի ուժով ֆիքսենք չորրորդ ուժի ներկայությունը խորհրդարանում: Եվ հաշվի առնելով ներկա քաղաքական իրավիճակը` լուրջ կանխատեսում ունեմ, որ այդ չորրորդ ուժն անգամ մեկ տոկոս վստահության քվե չի հավաքելու: Այդ դեպքում հասկանալի չի լինի, որ չնչին տոկոս հավաքած ուժը ներկայացված լինի խորհրդարանում»,- ասաց Նաիրա Զոհրաբյանն ու հավելեց` սակայն այս հարցի շուրջ կառավարության հետ եկել են փոխզիջման:
Ըստ իրենց պայմանավորվածության`չորրորդ ուժի համար գոնե նվազագույն շեմ պիտի սահմանվի 2 տոկոսը: Զոհրաբյանը հավելեց՝ ընդհանուր առմամբ՝ խմբակցությունը ընտրական օրենսգրքի հետ կապված մտահոգություններ չունի:
