Տպել
Ռուսաստանի նախագահ Վլադիմիր Պուտինը «Վալդայ» ակումբում տեղի ունեցած հանդիպման ժամանակ հայտարարել է, որ նրանք, ովքեր Ռուսաստանի դեմ միջուկային զենք կօգտագործեն, «պարզապես կմեռնեն», իսկ ռուսները՝ դրախտում կհայտնվեն: Գրում է Russian.rt.com-ը: «Ագրեսորը պետք է իմանա, որ պատիժն անխուսափելի է, որ ինքը կոչնչացվի: Իսկ մենք՝ ագրեսիայի զոհերս, որպես նահատակ, դրախտ կընկնենք, իսկ նրանք պարզապես կմեռնեն, քանի որ նույնիսկ ժամանակ չեն ունենա զղջալու համար», – ասել է Պուտինը:
Նախագահն ընդգծել է, որ միջուկային զենքի կիրառումը գլոբալ աղետ կլինի, և Ռուսաստանը չի կարող դրա նախաձեռնողը լինել:
«Իհարկե, դա համաշխարհային աղետ է, բայց ես կրկնում եմ, մենք չենք կարող լինել այդ աղետի նախաձեռնողը, քանի որ մենք չունենք նախազգուշական հարված», – ասել է Պուտինը: Նա նշել է, որ Ռուսաստանից հարված կարող է իրականացվել միայն այն դեպքում, եթե որևէ մեկն իր տարածքում միջուկային հարված հասցնի: «Երբ մենք համոզվում ենք, և դա տեղի է ունենում մի քանի վայրկյանում, որ հարձակումն ուղղված է Ռուսաստանի տարածքին, միայն դրանից հետո ենք պատասխան հարված հասցնում», – հստակեցրել է նախագահը:
