Տպել
ՀՀ տրանսպորտի, կապի և տեղեկատվական տեխնոլոգիաների նախարարության համար անհասկանալի է, թե ինչու է «Հյուսիս-հարավ ճանապարհային ծրագրով» շինարարությունը սկսվել ամենադյուրին հատվածներից: Ներդրումային պլանները տեղաբաշխելու են Սիսիան-Քաջարան հատվածում. մեկ թունելի և երկու կամրջի շինարարությամբ շուրջ երկու ժամով և 55 կիլոմետրով կրճատելու են Սիսիան- Քաջարան հատվածում անցողունակությունը:
Նախարարի պաշտոնակատար Հակոբ Արշակյանն այս մասին ասաց ԱԺ-ում պետական բյուջեի նախագծի քննարկմանը:
«Փորձում ենք հասկանալ, թե ինչպես է եղել, որ «Հյուսիս-հարավ»-ի ծրագիրը սկսվել է ամենադյուրին հատվածներից` դեպի Արտաշատ և դեպի Աշտարակ տանող խճուղիների շինարարությունից: Եվ այդպես էլ որևէ հստակ պատասխան չենք կարողանում գտնել, թե ինչու հարավային ուղղությամբ` լեռնային տարածքներում տեղակայված դժվարանցանելի հատվածներից չեն սկսել շինարարությունը: Եվ մեծ միջոցներ են ծախսել սարքելու ճանապարհահատվածներ, որոնք անցանելի և լավ վիճակում էին: Հիմա մենք ունենք հստակ դիրքորոշում, որ Սիսիան -Քաջարան հատվածում տեղաբաշխենք հետագա ներդրումային պլանները, պլանավորենք այնպես, որ հարավային ուղղությամբ կարողանանք անել շինարարական աշխատանքներ: Միայն մեկ թունելի և երկու կամրջի շինարարությամբ մենք կարողանում ենք շուրջ երկու ժամով և 55 կիլոմետրով կրճատել Սիսիան – Քաջարան հատվածում անցողունակությունը»,- ասաց նախարարի պաշտոնակատարը:
Նրա կարծիքով` դա կարող է լուրջ տնտեսական արդյունքի բերել: Նախարարի պաշտոնակատարը նկատեց, որ «Հյուսիս-հարավի» ճանապարհային միջանցքի կառուցապատման հետ կապված բազմաթիվ հարցադրումներ կան: «Մենք կարծում ենք, որ անհրաժեշտ է ունենալ այդպիսի ճանապարհ: Հետագայում մեր գործընկերների հետ գտնելու ենք ուղիներ հնարավորինս արագ այդ ճանապարհը կառուցելու և վերջացնելու համար»,- ասաց նա:
Արշակյանի կարծիքով` այդ ճանապարհը ռազմավարական նշանակություն ունի Հայաստանի համար: Հատկապես ջանքեր են գործադրվելու հարավային` լեռնային հատվածում դժվարանցանելի մասում թողունակությունը բարձրացնելու համար:
