Տպել
Կրկին Երևանի փողոցներում, բակերում, սուպեր ու մինի մարկետների պատերի տակ, կանգառներում ու անցումներում սիգի անվերահսկելի վաճառք է, վաճառք էլ չէ, վայրենի խրախճանք, որովհետև այդ ձկնատեսակն այս օրերին գտնվում է բազմացման շրջանում: Վաճառում են ձուկը ու դրա ձկնկիթը «շան մսի» գնով ու ոչ մեկի մտքով չի անցնում դրա դեմն առնել:
Ամեն տարի նույն պատկերն է, ամեն տարի հասարակությունն ու լրատվամիջոցներն ահազանգում են, բայց սայլը տեղից չի շարժվում:
Ավելի մեծ հանցանք բնության նկատմամբ, քան բազմացման շրջանում կենդանու կամ ձկան որսը, չի լինում: Ու քանի որ դա իսկապես հանցանք է, ապա ենթադրվում է, որ պետք է պատժվի, իսկ պատժելու համար հարկավոր է նախևառաջ հանցագործի ձեռքը բռնել:
Մի տարօրինակ զուգադիպությամբ ամեն տարի այս օրերին մեր ոստիկանները, բնապահպանական տեսուչներն ու մյուս պատկան մարմինները չեն կարողանում բռնել այդ անորսալի որսագողերին: Ամենուր ձուկը վաճառվում է, բայց թե ինչպես են այն որսում կամ տեղափոխում, ոչ ոք չգիտի:
Ամենայն հավանականությամբ, Սևանի որսագողերը ոչ միայն սուզանավ ունեն, որ չեն երևում, այլև թռչող ափսեներ, որոնցով ակնթարթորեն բերում, հասցնում են շուկա:
Հարգելի պատասխանատու կառույցներ, դուք այնքան բազմաթիվ եք, որ չգիտեմ էլ որ մեկիդ կոնկրետ դիմեմ, այս ամենի վերջը լինելո՞ւ է: Դուք հո ջայլա՞մ չեք, որ անտեսում եք այս սպանդը:
Մի հետաքրքիր պատճառաբանություն են հորինել, թե փողոցում վաճառողը պատասխանատու չէ որսագողության համար: Նույն տրամաբանությամբ գողոնը վաճառողն էլ պատասխանատու չէ հանցանքի համար, բայց գողի հետ հավասար պատասխանատվություն է կրում օրենքի առաջ: Ինչո՞ւ այս դեպքում չի գործում նույն սկզբունքը: Կարդում եմ բնապահպանության նախարարության լրահոսը, թե «էսքան դեպք ենք հայտնաբերել, էնքան տուգանք ենք կիրառել, եսիմ ինչքան էլ պետբյուջե ենք մուծել», ու ոչ մի տող ձկանագողերի մասին:
Նախկինում գոնե մի տողով գրում էին, թե «էսինչ տեղում էսքան հատ տիրազուրկ սիգ տեսակի ձուկ ենք հայտնաբերել»: Պատկերացնո՞ւմ եք, տիրազուրկ, այսինքն «Պռոսպեկտի շուկայի» մոտ, օրը ցերեկով, մայթին սիգն անտեր թափված է, իրենք էլ միամիտ հայտնաբերել են: Հիմա դա էլ չկա, ընտրությունները եղել, անցել են, էլ ոչ մեկին հետաքրքիր չի, թե ինչ է կատարվում երկրում:
Հիմա՝ ըստ պատկանելության.
ՀՀ վարչապետի պաշտոնակատար Նիկոլ Փաշինյան, ճիշտ ժամանակն ու դեպքն է, երբ անհրաժեշտ է ոմանց բռնել ու ասֆալտին փռել:
Բնապահպանության նախարարի պաշտոնակատար Էրիկ Գրիգորյան, Ձեր գերատեսչությունում էդպես էլ չի՞ գտնվելու մի մասնագետ, որ հուշի այս շրջանում արդյունագործական ձկնորսության աննպատակահարմարության մասին, նախարարությունը մտածո՞ւմ է Սևանի էկոհամակարգի մասին, թե՞ այս երկրում միայն Ամուլսար կա:
Բնապահպանության և ընդերքի տեսչական մարմնի ղեկավար Արթուր Գրիգորյան, որ օրինավոր որսորդների առաջ որսասեզոնը փակելու ցանկություն էիք հայտնում, այսպե՞ս էիք վերահսկելու: Ձեր կառույցի գոյության նպատակահարմարությունն ու օգտակար գործողության գործակիցն այսքա՞ն է:
Գեղարքունիքի մարզպետ Գնել Սանոսյան, որպես բնապահպանության նախկին փոխնախարար ու Սևանի պահապան մարզպետ, Դուք ոչ մի անելիք չունե՞ք, թե՞ ընտրողի ձայնը Սևանից թանկ է:
Հ.Գ.
Որ անկեղծ լինեմ, ոչ մի պատասխան էլ չեմ ակնկալում, որովհետև բոլոր պատասխաններն անգիր գիտեմ: Բայց պատասխանեք, հնարավոր է նոր օրիգինալ մտքեր հնչեն:
Էդուարդ Սարիբեկյան
