Տպել
Հայաստանի բռնցքամարտի հավաքականի գլխավոր մարզիչ Դավիթ Թորոսյանը բռնցքամարտի ֆեդերացիայի շուրջ ստեղծված անորոշ իրավիճակի վերաբերյալ իր մեկնաբանությունն է տվել:
Հիշեցնենք, որ օրերս ՀԱՕԿ գլխավոր քարտուղար Հրաչյա Ռոստոմյանը տեղեկացրել էր, որ ԱԻԲԱ-ն Հայաստանի բռնցքամարտի ֆեդերացիայից պահանջել է անցկացնել նոր ընտրություններ:
«Արթուր Գևորգյանը ֆեդերացիայի նախագահական ընտրությունների համար բաց քվեարկություն հայտարարեց՝ ասելով, որ ցանկացողները կարող են առաջադրել իրեն թեկնածությունը: Ոչ ոք թեկնածություն չառաջադրեց: Մեկ հոգու թեկնածություն կար, ինչի դեպքում փակ քվեարկությունն անիմաստ էր:
Հարց է առաջանում՝ ինչո՞ւ այդ ժամանակ չեկան այն մարդիկ, ովքեր ուզում էին ղեկավարել ֆեդերացիան: Ի՞նչ է նշանակում ԱԻԲԱ-ն նորից ընտրություններ է պահանջում: Հայաստանն ԱԻԲԱ-ի համար օտար երկիր է, և եթե օտար երկրից մի բանի մասին անընդհատ բացասական տեղեկատվություն են ուղարկում, կառույցից էլ պետք է ասեն՝ ի՞նչ է կատարվում, նորից ընտրեք:
Բայց հարցն այն է, թե ինչ ընտրեն, եթե արդեն ընտրված է, և ամեն ինչ կանոնակարգված է: Չգիտեմ, թե ինչու են ուզում որպես այլընտրանք բռնցքամարտի ազգային ֆեդերացիա բացել: Գուցե բացենք նաև համազգայի՞ն ֆեդերացիա…
Անհասկանելի իրավիճակ է: Արդեն իսկ գոյություն ունի Հայաստանի բռցմքամարտի ֆեդերացիա: Անընդհատ զանգել, գրել… Անհարմար է, չէ՞: Դա մեզ էլ պատիվ չի բերում»,- այսօր լրագրողների հետ հանդիպման ժամանակ ասաց Դավիթ Թորոսյանը:
Դիտարկմանը, որ ԱԻԲԱ-ից նշել են, թե ընտրությունները կազմակերպվել են խախտումներով, Թորոսյանը տվեց հետևյալ պատասխանը.
«Դա ավելի շատ երևակայության արդյունք է: Ի՞նչ խախտումների մասին է խոսքը: Ֆեդերացիայի նախագահական ընտրությունների ժամանակ որևէ խախտում տեղի չի ունեցել: ԱԻԲԱ-ում, հնարավոր է, շատ հետամուտ չեն լինում: Տեսնում են մի քանի թուղթ է եկել Հայաստանից՝ ինչ-որ ֆեդերացիայից կամ նախարարությունից, իրենք էլ մի քանի թուղթ են ուղարկում և ասում՝ նորից ընտրեք:
Արթուր Գևորգյանն իր գործունեությունը լավ է կատարել, ինչի մասին վկայում են արդյունքները: Ասում են՝ բռնցքամարտը սուզվո՞ւմ է: Հակառակը: Բողոքում են, թղթեր են ուղարկում, բայց եթե մի մարդ ընտրված է, ինչո՞ւ նորից ընտրենք»:
Դավիթ Թորոսյանը նաև նշեց, որ ստեղծված իրավիճակը բացասաբար է ազդում բռնցքամարտիկների վրա.
«Անկասկած, բռնցքամարտիկները տուժում են ստեղծված իրավիճակից: Մեր գերխնդիրը Տոկիոյի Օլիմպիական խաղերին մասնակցելն է: Գիտենք, թե ինչ է պետք անել, սակայն այս անորոշ իրավիճակը մեզ չի օգնում, ճիշտ ճանապարհի վրա չի դնում:
Մենք հիմա պայքարենք ֆեդերացիայի՞ համար, թե՞ մեր մարզիկների: Չգիտեմ՝ նախարարությունն ինչ դիրքորոշում ունի, սակայն նրանք էլ պետք է օգնեն մեզ, որովհետև եթե կա բավականին լավ գործող ֆեդերացիա, ինչո՞ւ պետք է անտեսել այդ ֆեդերացիան և ստեղծել նորը:
Վա՞տ ենք աշխատում: Ո՛չ, շատ լավ ենք աշխատում, հոյակապ: Լավ բանը տրորո՞ւմ են, ջարդո՞ւմ են»,- խոսքը եզրափակեց Դավիթ Թորոսյանը:
