Տպել
Բանգկոկի տարբեր շրջաններում փոշու, դիզելային մրի մասնիկներով և բենզինային շարժիչների արտանետման արգասիքներով մթնոլորտի աղտոտվածության մակարդակն արդեն մեկ շաբաթ է, ինչ կազմում է 72-ից մինչև 92 միկրոգրամ մեկ խորանարդ մետրի հաշվով՝ 50 միկրոգրամ նորմայի «վերին» սահմանի դեպքում: Այդ մասին հատուկ հայտարարության մեջ հայտնել է Թաիլանդի մայրաքաղաքի վարչակազմի մթնոլորտի աղտոտման վերահսկողության դեպարտամենտը:
Մեգապոլիսի վարչակազմի ինտերնետ-կայքում դեկտեմբերի 23-ի երեկոյան հրապարակված հայտարարության մեջ մայրաքաղաքի բնակիչներին խորհուրդ է տրվում հնարավորինս մնալ իրենց տներում, իսկ փողոց դուրս գալու անհրաժեշտության դեպքում կրել մառլյայի խոնավ դիմակներ կամ շնչադիմակներ: «Այս ամենի մեղավորը դեկտեմբերի վերջի համար արտասովոր տապն է և գրեթե լիակատար անհողմությունը»,- դեկտեմբերի 24-ին ՌԻԱ Նովոստիին ասել է Բանգկոկի օդերևութաբանական բյուրոյի խորհրդատու Քրայսաք Սիսամփանը:
«Բանգկոկը գտնվում է Սիամի ծոցի հենց ափին, և սովորաբար, երբ ծովից քամիներ են փչում, քաղաքի օդն ինքնամաքրվում է, ավելի ճիշտ՝ փոխվում Է դրա հաշվին, քաղաքը, կարծես, օդափոխվում է: Արդեն մեկ շաբաթ է, ինչ քամի գրեթե չկա, և ոչ տիպական շոգ է տարվա այս ժամանակի համար: Այժմ գիշերները ևս ջերմաստիճանը մնում է 30 աստիճանի և ավելի բարձր մակարդակում»,- պարզաբանել է մասնագետը: Նա նաև հիշեցրել է, որ Բանգկոկում օդի աղտոտման հիմնական ազդանյութը քաղաքային տրանսպորտի և դիզելային շարժիչնեով բազմաթիվ մասնավոր ավտոմոբիլ-պիկապների դիզելային մուրն է:
