Տպել
Լոնդոնի «Արսենալը» մոտ է «Բարսելոնայի» կիսապաշտպան Դենիս Սուարեսի հետ պայմանագիր կնքելուն:
The Sun-ը հայտնում է, որ լոնդոնցիների գլխավոր մարզիչ Ունայ Էմերին ժամանակին աշխատել է ֆուտբոլիստի հետ «Սևիլիայում» և շատ լավ ծանոթ է խաղացողին: Ըստ լրատվամիջոցի` կիսապաշտպանի ժամանումից հետո «զինագործների» կազմում կարող է տուժել Հայաստանի հավաքականի ավագ Հենրիխ Մխիթարյանը:
Մեր ընտրանու ֆուտբոլիստի տեղը թիմի մեկնարկային կազմում կարող է հարցականի տակ լինել: Էմերին շատ է վստահում Սուարեսին, ում հետ աշխատել է 2014/15 մրցաշրջանում:
25-ամյա ֆուտբոլիստը կարող է հանդես գալ կիսապաշտպանության կենտրոնում և եզրերում:
The Sun-ը գրում է, որ Էմերին վստահում է նաև Մխիթարյանին, ով այս մրցաշրջանում 20 հանդիպման է մասնակցել: Սակայն, հայ ֆուտբոլիստը մի քանի անգամ ձեռքից բաց է թողել գոլի հեղինակ դառնալու իրական հնարավորությունը` «Տոտենհեմի» և «Մանչեսթեր Յունայթեդի» հետ խաղերում:
Նշվում է, որ Սուարեսի հետ բանակցություններն ընթացքի մեջ են: Լոնդոնյան ակումբը դիտարկում է նաև Յանիկ-Ֆերեյրա Կարասկոյի տրանսֆերը գնելու հնարավորությունը:
Հավելենք, որ այս պահին Մխիթարյանն ապաքինվում է վնասվածքից և խաղադաշտ կվերադառնա հունվարի վերջին:
