Տպել
Մոսկվայի Վավերագրական կինոյի կենտրոնում հանդիսատեսը առաջին անգամ կտեսնի Անաստաս Միկոյանի թոռան՝ երգահան, կիթառահար Ստաս Նամինի «Հայաստանի հնագույն տաճարները» վավերագրական ժապավենը՝ Ամենայն հայոց կաթողիկոս Գարեգին 2-րդի մեկնաբանությամբ։ Այս մասին հաղորդում է «Ստաս Նամինի կենտրոնը»։
Ֆիլմը հեղինակի յուրատեսակ անդրադարձն է իր մշակութային արմատներին։
«Մանկուց Հայաստանն ինձ համար կախարդական երկիր է եղել, որի մասին միշտ պատմել է մայրս, իսկ հեռավոր լեռնային, Սանահին ռոմանտիկ անունով գյուղում ծնվել են իմ պապն ու նրա եղբայրները։ Հայաստանի հետ է կապված իմ բոլոր ազգականների կյանքը, պարզվում է, որ ես էլ եմ հայ, ինչը ինձ՝ Մոսկվայում ծնված ու մեծացած մարդու մտքին չէր գալիս մինչև վերջին ժամանակներս»,- անկեղծանում է Նամինը։
Առաջին անգամ երգահանը Հայաստան է ժամանել 14 տարեկանում, Սևանա լճում արել իր առաջին լուսանկարները, իսկ փոքրիկ լեռնային գյուղում փորձել պանրով ու մեղրով լավաշը, որը նրա սիրելի ուտեստն է մինչ օրս։
Դրանից հետո ևս մի քանի դիպվածային ուղևորություն է եղել դեպի Հայաստան, իսկ մի քանի տարի առաջ իր ընկերոջ՝ բարերար Ռուբեն Վարդանյանի հրավերով Նամինը ճանապարհորդեց՝ լինելով Հայաստանում ու Արցախում։
Այդ ընթացքում նա անցավ ավելի քան 2 հազար կիլոմետր և վավերագրեց տեսածը։
Ահա, թե ինչպես է ստեղծվել Նամինի ֆիլմը։
stasnamincentre.timepad.ru
