Տպել
Անգլիայի Պրեմիեր լիգայի 26-րդ տուրում Լոնդոնի «Արսենալը» Հադերսֆիլդ քաղաքի «Ջոն Սմիթ Գելֆարմ» ստադիոնում կհյուրընկալվի տեղի համանուն թիմին:
«Զինագործների» գլխավոր մարզիչ Ունայ Էմերին խոսել է կիսապաշտպաններ Հենրիխ Մխիթարյանի և Դենիս Սուարեսի` խաղին մասնակցելու հնարավորության մասին:
«Մխիթարյանը լիովին պատրաստ չէր «Մանչեսթեր Սիթիի» դեմ խաղին:
Մ23 թիմի հետ հանդիպում և մարզումներ անցկացնելուց հետո, կարծում եմ, որ Հենրիխը կարող է մասնակցել «Հադերսֆիլդի» դեմ խաղին»,- իսպանացի մասնագետի խոսքն է մեջբերում Daily Star-ը:
Նշենք, որ հանդիպումը կկայանա փետրվարի 9-ին, Երևանի ժամանակով 19:00-ին: Հավելենք, որ մրցող թիմերի միջև կայացած նախորդ 3 խաղերում «Արսենալը» հաղթել է ընդհանուր 7:0 հաշվով:
Մխիթարյանը «զինագործների» մինչև 23 տարեկանների թիմի կազմում փետրվարի 5-ին մասնակցել էր «Վեսթ Հեմի» Մ23 թիմի դեմ խաղին, որը եղանակային անբարենպաստ պայմանների պատճառով անավարտ էր մնացել:
Դեկտեմբերի վերջին ստացած ոտնաթաթի վնասվածքից ապաքինվելուց հետո Մխիթարյանն «Արսենալի» առաջին թիմի կազմում որևէ հանդիպման չի մասնակցել:
Վերջին անգամ 30-ամյա հայ ֆուտբոլիստն «Արսենալի» կազմում դաշտ է դուրս եկել դեկտեմբերի 19-ին Անգլիայի Լիգայի Գավաթի խաղարկության` «Տոտենհեմի» հետ խաղում:
