Տպել
Քաղաքացու օրը կառավարության օրը չէ, պետք չէ այն լապել կառավարությունում գտնվող մի խումբ մարդկանց հետ։ Այս մասին NEWS.am-ի հետ զրույցում ասաց ՀՀ ԱԺ «Իմ քայլը» խմբակցության պատգամավոր Թագուհի Ղազարյանը։
Քաղաքացու օրը, նրա համոզմամբ, պետք է լինի այն քաղաքացիների օրը, որոնք իշխանությունը վերադարձրեցին իրենց։ «Դա, իմ կարծիքով, կարևոր իրադարձություն է, որը պետք է ինչ–որ կերպ նշել։ Քաղաքացու օրը չպետք է կապել մի խումբ մարդանց հետ, որոնք հիմա կառավարությունում են, որովհետև սա կառավարության օրը չէ, դա քաղաքացու օրն է»,–շեշտեց նա։
Պատգամավորի համոզմամբ՝ «Հանրապետական» կուսակցության անդամները ևս պետք է այդ օրը իրենց տոնը համարեն։
Նա կարծիք հայտնեց նաև, որ քաղաքացու օրը ամեն մեկը ինքը պետք է որոշի՝ ինչպես նշի. «Սակայն այն ևս մեկ առիթ պիտի լինի քաղաքացու իրավունքների, պետության մեջ նրա դերի ու նրա պարտականությունների մասին խոսելու համար»։
Հարցին՝ կիսո՞ւմ է ԿԳ նախարար Արայիկ Հարությունյանի տեսակետը, որ քաղաքացու օրը նշանակությամբ 2-րդ տոնն է անկախության տոնից հետո, Թագուհի Ղազարյանը պատասխանեց. «Անկախությունից հետո էլ մարդիկ կային, որ ասում էին ԽՍՀՄ–ի ժամանակ լավ է, սակայն նշում էին անկախության տոնը, որովհետև անկախությունը շրջադարձային է եղել իրենց և երկրի համար, այս առումով համեմատելի են այս իրադարձությունները, քանի որ շրջադարձային էին այն մի քանի շաբաթները, երբ քաղաքացու վստահությունն իր ուժերի նկատմմաբ վերածնվեց»։
Պատգամավորը տեղին է համարում ապրիլյան պատերազմի մասնակիցների բողոքը, որ չկա ապրիլյան պատերազմի զոհերի հիշատակի օր, սակայն միաժամանակ նկատում է, որ նախորդ իշխանությունները այդպիսի օր չեն հռչակել, ավելին՝ 2017 թվականի ապրիլի 2-ին խորհրդարանական ընտրություններ էին անցկացրել։
Հիշեցնենք՝ երեկ կառավարության նիստում որոշում կայացվեց ապրիլի վերջին շաբաթ օրը նշել որպես Քաղաքացու օր: Դրանից հետո Նիկոլ Փաշինյանն իր ֆեյսբուքյան էջում առաջարկեց հանրային քննարկում անցկացնել օրը նշելու տարբերակների վերաբերյալ:
