Տպել
Սահմանադրական դատարանը, քննության առնելով Ռոբերտ Քոչարյանի դիմումը Քրեական դատավարության օրենսգրքի 419-րդ հոդվածի երկրորդ մասի վերաբերյալ, որոշեց, որ Վճռաբեկ դատարանը գործն ըստ էության չլուծող դատական ակտերի վերաբերյալ կայացնում է վերջնական դատական ակտ, և հենց այդ մեկնաբանությամբ նորմը համապատասխանում է Հայաստանի Հանրապետության Սահմանադրության պահանջներին. ինչպե՞ս եք գնահատում հօգուտ Ռոբերտ Քոչարյանի այս որոշումը:
Պատասխանելով «Առաջին լրատվական»-ի հարցին՝ Արցախի անվտանգության խորհրդի քարտուղար Վիտալի Բալասանյանը ասաց. «Ես առ այսօր անհատապես չեմ պաշտպանել որևէ մեկին, իմ գնահատականները հնչել են երևույթի կապակցությամբ, թե ինչ է կատարվում իրավական դաշտում: Համոզված եմ, որ անկախ ամեն ինչից՝ մի օր մեր իրավապահ կամ դատաիրավական համակարգը համարժեք, համապատասխան, ճիշտ լուծում կտա այդ հարցին: Դա ի շահ է մեր երկրին, մեր ժողովրդին, մեր անվտանգությանը, մեր ամեն ինչին, մեր ապագային»:
Արցախը, Արցախի իշխանությունները շարունակում են սատարել Ռոբերտ Քոչարյանին, մենք հիշում ենք՝ անգամ ստորագրահավաք կազմակերպեցին. այս դիտարկմանը ի պատասխան՝ Վ. Բալասանյանը նշեց. «Նորից եմ կրկնում. այստեղ հարցը անձնական չէ: Որևէ մեկին՝ Ռոբերտ Քոչարյանը կլինի թե Լևոն Տեր-Պետրոսյանը կլինի, վաղը կարող է Նիկոլ Փաշինյանը լինի կամ Արմեն Սարգսյանը լինի, մենք երևույթին ենք գնահատական տվել: Այդ պահին այնտեղ հայտնվել է Ռոբերտ Քոչարյան անուն-ազգանունով մարդ»:
