Տպել
ՅՈՒՆԻՍԵՖ-ի ազգային դեսպան դարձած հունահռոմեական ըմբշամարտի չեմպիոն Արթուր Ալեքսանյանը, որն ավելի հայտնի է «սպիտակ արջ» մականունով, խոստանում է պաշտպանել հայ երեխաների իրավունքներն ու նպաստել նրանց ֆիզիկական ու մտավոր զարգացմանը։
Մարզիկը խոստովանեց, որ դեսպան դառնալու առաջարկն ընդունել է առանց տարակուսելու և այսուհետ նրա գործունեությունը կլինի նաև երեխաների պաշտպանությունն ու նրանց ապագայի մասին հոգ տանելը։
Արթուրն այդ տիտղոսը շատ պատասխանատու է համարում. նա մտադիր է հնարավորինս շատ ջանք գործադրել հայ երեխաների իրավունքները, ու առաջին հերթին, առողջ կյանքի իրավունքը պաշտպանելու համար։ Մարզիկն այդ նպատակով պատրաստ է նույնիսկ «ծայարհեղ միջոցների» դիմել` հավաքել բոլոր երեխաների հեռախոսներն ու նրանց մարզադահլիճներ ու մանկական խաղահրապարակներ տանել։
«Մանկությանս ամենավառ հիշողությունն իմ առաջին այցն է մարզադահլիճ, իսկ հետո արդեն հաղթանակս պատանեկան մրցումում։ Ուզում եմ իմ օրինակով ոգեշնչել երեխաներին ու օգնել նրանց իրականացնել իրենց երազանքները», – ասաց չեմպիոնը։
Ալեքսանյանն, իսկապես, ամենայն պատասխանատվությամբ է մոտենում այդ առաքելությանն ու նույնիսկ հասցրել է ուսումնասիրել հայ երեխաների առողջական վիճակների մասին զեկույցները։
Այդ առումով նա առաջնահերթ է համարում առողջ սնունդն ու ֆիզիկական պատրաստվածությունը։ Նա խորհուրդ է տալիս կանոնավոր կերպով, բայց քիչ-քիչ սպորտով զբաղվել, ու ճիշտ սնվել։ Ի դեպ, Արթուրն էլ հետևում է այդ խորհրդին ու ճիշտ է սնվում։ Սակայն ինչպեսև հարիր է իսկական «սպիտակ արջին», նախընտրում է միս, մասնավորապես` թոնրի խորոված։
Ալեքսանյանը ծնվել է 1991թ-ին Գյումրիում։ Նա 2016 թ-ին Ամառային Օլիմպիական խաղերի ոսկե, 2012 թ-ի Օլիմպիական խաղերի բրոնզե մեդալակիր է և Աշխարհի եռակի (2014, 2015, 2017), Եվրոպայի քառակի (2012, 2013, 2014, 2018), 2019 թ-ի Եվրոպայի և Հայաստանի բազմակի չեմպիոն է։
