Տպել
COVID-19 կորոնավիրուսը որքա՞ն երկար կարող է կենսունակ մնալ տարբեր մակերևույթներին: Կորոնավիրուսով աղտոտված առարկաներն արդյոք իրական սպառնալիք ներկայացնո՞ւմ են: Այս հարցերի պատասխանները փորձել են գտնել Գրայֆսվալդի Համալսարանական հիվանդանոցի մասնագետները:
Պարզվել է, որ իրերի վրա գտնվելիս վիրուսը կարող է իր ախտածին հատկությունները պահպանել և իրական վտանգ ներկայացնել մոտ մեկ շաբաթ:
Science Alert պարբերականը հայտնում է, որ ներկայումս ստույգ հայտնի չէ՝ մարդն արդյոք կարո՞ղ է կորոնավիրուսով վարակվել հպվելով աղտոտված մակերևույթներին, այնուհետև աչքերին, քթին և բերանին: Հետազոտողները վիրուսի պոտենցիալ կենսունակությունը գնահատել են այլ ախտածինների հատկությունների մասին 22 գիտական աշխատանքների վերլուծության հիման վրա:
Պարզվել է, որ մարդուն վարակելուն ունակ կորոնավիրուսները կարող են 4-ից մինչև 5 օր կենսունակ մնալ այնպիսի նյութերի վրա, ինչպիսին են ալյումինը, փայտը, թուղթը, պլաստիկը և ապակին: Վերին սահմանն է 9 օր ժամկետը՝ 9 օր հետո վիրուսն արդեն կորցնում է իր ախտածին հատկությունները:
Գիտնականների տվյալներով՝ կորոնավիրուսներից որոշները կարող են կենսունակ մնալ նույնիսկ 28 օրից ավելի, սակայն այս տարատեսակները կարող են վարակել միայն կենդանիներին:
Հատկանշական է, որ ցածր ջերմաստիճանը և օդի խոնավությունը է՛լ ավելի են մեծացնում տիրոջ օրգանիզմից դուրս վարակիչ ագենտի ակտիվության ժամկետը:
Կորոնավիրուսների տարածումը նվազեցնելու համար գիտնականները հիվանդանոցներին խորհուրդ են տալիս մակերևույթները մանրակրկիտ ախտահանել հիպոքլորիտ նատրիումիով, ջրածնի պերօքսիդով կամ էթանոլով պատրաստված լուծույթներով: Իսկ մարդկանց կանխարգելման համար խորհուրդ է տրվում հետևել անձնական հիգիենայի սկզբունքներին և ձեռքերը օճառով հաճախ լվանալ հոսող ջրի տակ:
