Տպել
Ուսուցիչներից ու դասախոսներից բացի հեռավար ուսուցման գործընթացին են միացել նաև հայտնի մարդիկ։ Ցանկը գլխավորում է ՀՀ նախագահ Արմեն Սարգսյանը։
Ուրբաթ՝ մարտի 20-ին, նախագահն առցանց դասախոսություն է կարդացել Երևանի պետական համալսարանի մաթեմատիկայի և մեխանիկայի, ֆիզիկայի, ինֆորմատիկայի և կիրառական մաթեմատիկայի, ինչպես նաև արևելագիտության ֆակուլտետների մի խումբ ուսանողների համար։
45 րոպե տևողությամբ դասաժամի ընթացքում նախագահն անդրադարձել է ոլորտային թեմաների, այդ համատեքստում նաև՝ աշխարհում նոր կորոնավիրուսի տարածման խնդրին: Նա շեշետել է, որ երբեմն ինքնամեկուսացումը մտավոր աշխատանքի համար ամենաարդյունավետ տարբերակն է։ Սարգսյանը նշել է, որ պետք է պատասխանատվություն կրել ոչ միայն երկրի, ազգի, այլև սեփական անձի հանդեպ։ Նախագահը արժևորել է ժամանակն ու ընդգծել, որ եթե մարդը մեկուսացած է իր տանը, ապա պետք է այդ ժամանակը հնարավորինս արդյունավետ օգտագործի նոր գիտելիքներ ստանալու համար։
Արտակարգ դրության պայմաններում երեխաների համար պարբերաբար հեքիաթներ է կարդալու ԿԳՄՍ նախարար Արայիկ Հարությունյանը։ Նախարարն ուզում է օգտագործել կարանտինի ժամանակահատվածը մշակույթի հանդեպ հետաքրքրությունը մեծացնելու համար։ Նրա խոսքով, այս օրերին առցանց դասընթացների դիտումների քանակը վկայում է հայ մշակույթի, արվեստի ու գիտության հանդեպ հասարակության մեծ հետաքրքրության մասին։
ՀՀ բարձրագույն որակավորման կոմիտեի նախագահ Սմբատ Գոգյանն էլ մաթեմատիկայի դաս է անցկացրել տարրական ու բարձր դասարարնների աշակերտների համար։ Նա որոշել է ներկայացնել մաթեմատիկայի տրամաբանական հայեցակարգը։
Աշակերտների մեդիագրագիտությունը բարձրացնելու նպատակով համապատասխան դասախոսություն է անցկացրել նաև տեղեկատվական ոլորտի անվտանգության փորձագետ Սամվել Մարտիրոսյանը։ 7-8 դասարանցիներին նա բացատրել է՝ ինչպես ստուգել համացանցում հրապարակված տեղեկության հավաստիությունը, զգուշացրել է սոցիալական ցանցերում անձնական տեղեկություն հրապարակելու վտանգների մասին։
Հաշվի առնելով, որ ուսանողների ու աշակերտների հետ առցանց դասընթացները աստիճանաբար ավելի լայն տարածում են ստանում, որոշեցինք պարզել՝ արդյո՞ք ՀՀ վարչապետ Նիկոլ Փաշինյանը չի ցանկանում միանալ այդ յուրօրինակ ֆլեշմոբին։ Վարչապետի մամուլի խոսնակ Մանե Գևորգյանը Sputnik Արմենիայի հետ զրույցում ասաց, որ այդ գաղափարը չի քննարկվել։ Նա խոստացավ, որ նման որոշում լինելու պարագայում անպայման կհրապարակի։ Նշենք, որ Փաշինյանը ոչ միայն նախկին լրագրող է, այլև գրեթե ամբողջ գիտակից կյանքում քաղաքականության մեջ է։ Կարծում ենք, նա երիտասարդ սերնդին ասելիք կունենա։ Ամեն դեպքում՝ սպասենք։
