Տպել
«Երեմյան Փրոջեքթսի» Խոհարարական արվեստի և հյուրընկալության ակադեմիան ճանապարհեց խոհարարական և ռեստորանի կառավարման գիտելիքներով զինված ու մրցունակ մասնագետների ևս մի քանի խումբ: Ապրիլի 13-ին, կայացավ շրջանավարտների ավարտական վկայականների հանձնման պաշտոնական արարողությունը:
Միջոցառման մեկնարկին շրջանավարտներին իր շնորհավորական խոսքն ուղղեց «Երեմյան Փրոջեքթս» ընկերության գլխավոր տնօրեն Դավիթ Երեմյանը և ապագա խոհարարների, հրուշակագործների ու ռեստորանային մենեջերների հետ կիսվեց իր հաջողության պատմությամբ ու պատասխանեց նրանց հետաքրքրող հարցերին:
«Այսօր դուք ձեր քայլերն ենք անում նոր կյանք, որը մտնում եք մասնագիտական գիտելիքներով, փորձով, հմտություններով, որոնք օգնելու են ձեզ իրականացնել ձեր նպատակներն ու երազանքներն: «Երեմյան փորջեքթս» ընկերությունն իր այս շատ սպասված ու պահանջված նախագիծը՝ Խոհարարական արվեստի և հյուրընկալության ակադեմիան բացելով՝ նպատակ ուներ շուկայի պահանջարկին արձագանքել բարձր որակավորում ունեցող, հիմնարար գիտելիքներով ու հմտություններով օժտված մասնագետներով, ովքեր մրցունակ կլինեն ոչ միայն մեր երկրում, այլ նաև տարածաշրջանում և միջազգային շուկայում։ Բայց այս ոլորտում մասնագետ լինելու համար պետք է սիրել այս աշխատանքը, պետք է պատկերացնել ու հասկանալ այս ոլորտը: Այս ոլորտում հնարավոր չէ ուղղակի աշխատել առանց անընդմեջ սովորելու, զարգանալու, կատարելագործվելու, սիրելու այս գործը, ջանք ու եռանդ չխնայելոււ: Ցանկանում եմ, որ այս ավարտական վկայականները դառնան ձեզ համար անհասանելի թվացող բարձունքների նվաճման, նոր և ցանկալի հաջողությունների ձեռքբերման սկիզբն ու երաշխիքը»,- նշեց Դավիթ Երեմյանը:
«Երեմյան Փրոջեքթսի» խոհարարական արվեստի և հյուրընկալության ակադեմիայի տնօրեն Աիդա Տիգրանյանը, շնորհավորելով շրջանավարտներին, իր խոսքում նշեց.
««Երեմյան ակադեմիան» ուսանողների համար ոչ միայն զուտ կրթական վայր է դառնում, այլև հոգեհարազատ մի միջավայր, ուր միշտ ուզում են վերադառնալ: Մեր շրջանավարտներից շատերն ավարտելուց հետո մշտապես հյուր են գալիս, պատմում իրենց ձեռքբերումների, հաջողությունների ու նոր գաղափարների մասին: Իսկ մեր դասավանդող թիմն էլ միշտ մեծ սիրով ու պատրաստակամությամբ օգնում է նրանց խորհուրդներով ու դիտարկումներով»:
«Երեմյան ակադեմիայի» հրուշակագործության սկսնակների խմբի շրջանավարտ, մասնագիտությամբ զբոսավար Էլյա Խաչատրյանը խոստովանում է՝ մինչ Ակադեմիայում սովորելը, հրուշակագործությունը որպես հոբբի է դիտարկել.
«Ինձ միշտ հետաքրքրել է, թե ինչու այլ երկրների հյուրընկալության ակադեմիայի մոդելը չկա մեր երկրում, և ահա այսօր ես Հայաստանում, հենց նմանատիպ կենտրոնում՝ «Երեմյան ակադեմիայում» ավարտում եմ իմ ուսումնառությունը: Ակադեմիայում սովորելիս հասկացա, որ ինձ տրված գիտելիքների և իմ աշխատասիրության շնորհիվ կարող եմ դառնալ ոլորտի պրոֆեսիոնալ ու պահանջված մասնագետ: Ինչու ոչ, այդ գիտելիքները կարող եմ կիրառել նաև իմ սեփական փոքրիկ բիզնեսը հիմնելիս»:
Շրջանավարտներից Ադելինա Մովսիսյանն էլ նշում է, որ եթե չլիներ «Երեմյան ակադեմիան», գուցե այդպես էլ չհայտնվեր խոհարարական ոլորտում ու չզբաղվեր իր երազած աշխատանքով.
«Ես ավարտել եմ Երևանի գեղարվեստի պետական ակադեմիան: Իմ մասնագիտությունն ինքնին պահանջում է անընդհատ ստեղծագործել, բայց ինձ անհրաժեշտ էր ոգեշնչման աղբյուր, որը կօգներ իրականացնել իմ գաղափարները: Երբ տեղեկացա, որ Ակադեմիան ունի Խոհարարական արվեստ սկսնակների համար ծրագիրը, անմիջապես որոշոցի մասնակցել դասընթացին, քանի որ մանկուց եմ երազել այս ոլորտում ստեղծագործելու մասին: Խոհանոցը դարձավ իմ ոգեշնչման վայրը: Ակադեմիայում ստացած գիտելիքներն ու հմտություններն օգնեցին, որպեսզի ավարտելուց հետո անմիջապես անցնեմ աշխատանքի և զբաղվեմ իմ սիրելի գործով»,- պատմում է շրջանավարտը:
Խոհարարական արվեստ բաժնի ուսանող Գագիկ Դանիելյանը, հետաքրքրված լինելով ռեստորանային բիզնեսի կառավարմամբ ու խոհարարությամբ և նպատակ ունենալով հիմնել ընտանեկան սրճարան կամ ռեստորան, որոշեց Ակադեմիայում ուսանել կնոջ հետ:
«Ակադեմիայում ես գնահատում եմ ոչ միայն մասնագետների պրոֆեսիոնալիզմը, այլև այն, որ այստեղ արդյունավետորեն արձագանքում են ոլորտի նոր մարտահրավերներին՝ ներդնելով ու կիրառելով ժամանակակից մոտեցումներ: Տարբեր երկրների խոհանոցներ ուսումնասիրելուն զուգահեռ մենք նաև ծանոթանում ենք ավանդական ու դասական ուտեստների պատրաստման գաղտնիքներին»,- նշեց Գագիկ Դանիելյանը:
«Մասնագիտական կրթությունն ապահովելով՝ մենք կկարողանանք զարգացնել ռեստորանային բիզնես-մշակույթը։ Մեր ձգտումն է ապահովել գրագետ և պրոֆեսիոնալ կադրեր, որոնք կհամալրեն թե´ երևանյան, թե´ հանրապետության այլ վայրերի, թե´ արտերկրյա HoReCa հատվածի կազմակերպությունների աշխատակազմերը։ Մեր գլխավոր նպատակներից է հայկական խոհանոցն ու հյուրընկալությունը ճանաչելի դարձնել ամբողջ աշխարհում, որպես բրենդ ներկայացնել։ Այսօր, այս դժվարին օրերին, աշխարհաքաղաքական այս իրավիճակում հայկական խոհանոցի և հյուրասիրության մշակույթի պահպանումը շատ ավելի կարևոր է դարձել»,- եզրափակեց Դավիթ Երեմյանը:
Նշենք, որ «Երեմյան Փրոջեքթս» ընկերության Խոհարարական արվեստի և հյուրընկալության ակադեմիան հիմնադրվել է 2019 թվականի ապրիլի 8-ին՝ նպատակ ունենալով տեղական և միջազգային աշխատաշուկայի համար պատրաստել բարձրորակ կադրեր, բացահայտել և կրթել ոլորտի տաղանդներին: Ակադեմիայի առաքելությունը Հայաստանում խոհարարի և սպասարկման ոլորտի մասնագիտությունների զարգացումն ու դրանց հեղինակության բարձրացումն է: «Երեմյան ակադեմիան» իր երկու տարվա գործունեության ընթացքում ունեցել է շուրջ 700 ուսանող և ավելի քան 30 լրացուցիչ կրթական ծրագիր:
