Տպել
Ռուս խաղաղապահները շուրջօրյա ռեժիմով են կատարում իրենց առջև դրված խնդիրը։ Վերջին մեկ ամսում խախտումներ չեն արձանագրվել։
Ռուսական խաղաղապահ զորախմբի զինծառայողները կատարում են Լեռնային Ղարաբաղում հրադադարի պահպանման վերաբերյալ պայմանավորվածությունների իրականացման վերահսկողության խնդիրները։ Տեղեկությունը հայտնում է Ռուսաստանի պաշտպանության նախարարությունը:
Ռուսական ինժեներասակրավորական ստորաբաժանումներն ականազերծել են մոտ 5 հա տարածք և օբյեկտներ, ոչնչացրել են մոտ 20 չպայթած զինամթերք:
Հրադադարի ռեժիմը վերահսկելու և սադրիչ գործողություններ թույլ չտալու նպատակով ռուսական խաղաղապահ զորախմբի շարժական խմբերը 66 անգամ պարեկություն են արել սահմանազատման գծի երկայնքով:
Նրանք Ամարաս ու Գանձասար են ուղեկցել ավելի քան 400 ուխտավորի։
Մարդասիրական արձագանքման ռուսական կենտրոնի զինծառայողները բարեգործական կազմակերպությունների մասնակցությամբ 11 ակցիա են անցկացրել տեղահանվածներին ու կարիքավոր ընտանիքներին օգնություն ցուցաբերելու ուղղությամբ: Տրամադրվել է մոտ 3 տոննա մարդասիրական օգնություն։ Ռուսական խաղաղապահ զորախմբի կողմից տարածաշրջանում խաղաղության պահպանման խնդիրների կատարումը շարունակվում է ավելի վաղ ձեռք բերված պայմանավորվածություններին համապատասխան:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին:
