Տպել
ՀՀ Արարատի մարզպետ Արամայիս Գրիգորյանը Բարձրաստիճան պաշտոնատար անձանց էթիկայի հանձնաժողով է ներկայացրել մարզպետի պաշտոնում նշանակվելու օրվա դրությամբ ունեցած եկամուտների և ունեցվածքի մասին հայտարարագիրը:
Արամայիս Գրիգորյանն ունի մեկ առանձնատուն, բազմաբնակարան շենքում երկու բնակարան, հասարակական և արտադրական նշանակության մեկական տարածք, մեկ հողամաս և բազմամյա տնկի: Մարզպետին ունի նաև թվով չորս շարժական գույք` Lexus LS 600, VAZ 2121, Mitsubishi Pajero io և ZIL բեռնատար ավտոմեքենաներ:
Պաշտոնը ստանձնելու օրվա դրությամբ՝ փետրվարի 2-ին, նա ունեցել է 776 հազար ԱՄՆ դոլար, 300 հազար ռուսական ռուբլի և 961 միլիոն ՀՀ դրամ: 2017 թվականի հունվարի 1-ից մինչև փետրվարի 2-ն Արամայիս Գրիգորյանը որպես աշխատավարձ ստացել է 734 հազար դրամ եկամուտ, շահաբաժնից ստացել է 5.2 և 24 միլիոն դրամ, իսկ այլ եկամուտները, որոնց տեսակը հայտարարագրում նշված չէ, կազմել են 46.1 միլիոն դրամ: Ընդհանուր առմամբ, 1 ամսում Գրիգորյանը ստացել է 76.6 միլիոն դրամ՝ մոտ 160 հազար դոլար:
Արամայիս Գրիգորյանը հայտարարագրերը ներկայացնելու հարցում «անփույթ» է, քանի որ ՀՀ բնապահպանության նախարարի պաշտոնից ազատվելուց հետո էթիկայի հանձնաժողով ներկայացրած հայտարարագրում նշում չի կատարել թե ինչ անշարժ և գույք ունի, իսկ բաժնեմասերի մասին ընդհանրապես «մոռացել» է:
Նրա միայն 2014 թվականի հայտարարագրից ենք կարողանում պարզել, թե ինչ բաժնեմասեր է ունեցել: Պարզվում է, որ Գրիգորյանը երեք տարբեր ընկերությունում ունի 25 հազարական դրամ արժողությամբ առանձին-առանձին բաժնեմասեր, որոնցից էլ ստացել է իր «այլ եկամուտները»:
