Տպել
Բեյլորի համալսարանի ամերիկացի գիտնականները եկել են պարադոքսալ եզրակացության՝ որքան շատ ժամանակ են անցկացնում մարդիկ սոցիալական ցանցերում, այնքան ավելի միայնակ են զգում։ Հետազոտությունը հրապարակվել է Personality and Social Psychology Bulletin (PSPB) գիտական ամսագրում:
Թիմը վերլուծել է մոտ 7000 հոլանդացի մեծահասակների տվյալներն ինը տարվա ընթացքում՝ հասկանալու համար, թե ինչպես են թվային սովորություններն ազդում բարեկեցության վրա:
Արդյունքները ցույց են տվել, որ սոցիալական մեդիայի և՛ պասիվ (դիտարկումն առանց շփվելու), և՛ ակտիվ (տեղադրում և հաղորդակցություն) օգտագործումը կապված է միայնության զգացողության ավելացման հետ:
Փորձագետները ենթադրում են, որ առցանց շփումները չեն կարող փոխարինել դեմ առ դեմ հաղորդակցությանը, որն անհրաժեշտ է սոցիալական կարիքները բավարարելու համար։
«Սոցիալական մեդիան առաջարկում է մուտք դեպի առցանց համայնքներ, սակայն դրանց օգտագործումը՝ ակտիվ թե պասիվ, չի նվազեցնում միայնությունը և նույնիսկ կարող է մեծացնել այն», – ասում է հետազոտության հեղինակ, պրոֆեսոր Ջեյմս Ռոբերթսը:
Գիտնականները նաև երկկողմանի կապ են գտել՝ միայնակ մարդիկ ավելի հաճախ են դիմում սոցիալական ցանցեր, բայց դա միայն վատացնում է նրանց վիճակը։
Հետազոտությունն ընդգծում է հոգեկան առողջության համար դեմ առ դեմ շփումների կարևորությունը և թվային սովորությունների ազդեցության հետագա ուսումնասիրության անհրաժեշտությունը: Այս տվյալները կարող են օգնել մշակել առաջարկություններ սոցիալական մեդիայի ավելի առողջ օգտագործման համար:
