Տպել
Երկիր Մեդիայի «Բարև երկիր» առավոտյան ծրագրի ուղիղ եթերում հաղորդավարուհի Լուսինե Բադալյանն այսօր անհարմար վիճակի մեջ է ընկել։ Նա չի կարողացել զսպել ծիծաղը հյուրի խոսքի ժամանակ։ Tert.am Life–ի հետ զրույցում Լուսինեն ասաց, որ իր ծիծաղը որևէ կերպ կապված չէր հյուրի հետ, սակայն այն, ինչ եղել է եթերում, պրոֆեսիոնալ տեսանկյունից արդարացված չէ։
«Մեր գործընկերներից մեկը, որը տարեց մարդ է, մի քանի անգամ ամուսնացել–բաժանվել է։ Ամբողջ գովազդի ընթացքում ժակը կպել էր այդ խեղճ մարդուն ու կատակներ էր անում։ Ինքն էլ շատ լուրջ մարդ է։ Ժակը գնում–գալիս՝ զոքանչներից, կանանց բազմազանությունից էր հարցեր տալիս։ Ծիծաղում էինք ու վերջում ասաց` դու քանի՞ զոքանչ ես վերապրել։ Այդ վերապրել բառի վրա ես մեռա ծիծաղից։ Այդպես մի կերպ հավաքեցի ինձ ու մտանք ուղիղ եթեր։ Հյուրին հարց տվեցի, նա ևս օգտագործեց վերապրել այդ բառը` ասելով թեման նվիրվում է սիրիահայերին, քանի որ վերապրել են այդ ամենը։ Այդ վերապրել բառը համընկավ։ Նայեցի Ժակի ու այդ մարդու դեմքին ու սկսեցի ծիծաղել։ Հյուրն այստեղ կապ չուներ»,– բացատրեց Լուսինեն։
Հաղորդավարուհու խոսքով`պրոֆեսիոնալ տեսակետից ուղիղ եթերում նման պահվածքն իրականում արդարացված չէ։ «Դեպքեր լինում են, երբ ուղիղ եթերում նման բան են թույլ տալիս։ Ժամանակին կարող է թույլ տայի նման բաներ, բայց վերջին տարիներին ավելի լուրջ եմ մոտենում եթերին ու աշխատում եմ հնարավորինս կոռեկտ լինել եթերում։ Ամեն ինչ չափված, ձևած լինի։ Այս անգամ անտանելի էր, չկարողացա զսպել ինձ։ Այդ պահերին հույս ունես, որ կադրը քեզ վրա չի ու միկրոֆոնը պահած է կարող ես դուրս գալ։ Բայց քանի որ անձնակազմն էլ էր ուրախացել, ուզում էին հեռուստադիտողն էլ ուրախանար, կադրը պահել էին ինձ վրա»,– եզրափակեց Լուսինեն։
Ամբողջությամբ՝ life.tert.am
