Տպել
Ալեքսանդր Սպենդիարյանի անվան օպերայի և բալետի ազգային ակադեմիական թատրոնում կայացավ Համահայկական նվագախմբի առաջին համերգը` նվիրված Հայոց ցեղասպանության զոհերի հիշատակին և հայ ժողովրդի վերածննդին: Համերգին ներկա էին ՀՀ Նախագահ Սերժ Սարգսյանը, Առաջին տիկին Ռիտա Սարգսյանը, Ամենայն Հայոց Կաթողիկոս Ն.Ս.Օ.Տ.Տ. Գարեգին Բ-ն, Արցախի Հանրապետության նախագահ Բակո Սահակյանը, ՀՀ մշակույթի նախարար Արմեն Ամիրյանը, Երևանի քաղաքապետ Տարոն Մարգարյանը, բարձրաստիճան այլ անձինք:
Համերգի ընթացքում աշխարհի տարբեր երկրներից հայրենիքում հավաքված հայ երաժիշտները կատարեցին բացառապես հայ կոմպոզիտորների ստեղծագործություններ՝ աշխարհին ներկայացնելով հայ ժողովրդի հզոր ստեղծագործական ներուժը:
Համահայկական նվագախմբում ընդգրկվել են այնպիսի նվագախմբերի երաժիշտներ, ինչպես Մոսկվայի Մեծ թատրոնը, Սանկտ Պետերբուրգի Միխայլովսկի թատրոնը, Hessische Rundfunk-ը, Նյուրնբերգի սիմֆոնիկը, Մոսկվայի Չայկովսկի սիմֆոնիկը, Տոկիոյի ԻլյումինԱրթ Ֆիլհարմոնիկը, Տորոնտոյի սիմֆոնիկը, Պորտուգալիայի սիմֆոնիկը, Լա Մոնե սիմֆոնիկը, Լիլի ազգայինը, Դամասկոսի սիմֆոնիկը, Օվիեդոյի սիմֆոնիկը, Լիբանանի ֆիլհարմոնիկը, Թբիլիսիի օպերային թատրոնի նվագախումբը, Էկվադորի Գուայաքիլ սիմֆոնիկը, Մեքսիկայի Ակապուլկոյի ֆիլհարմոնիկը, Բելգիայի ազգայինը, Radio France-ի ազգային սիմֆոնիկը, Վալենսիայի սիմֆոնիկը, Gewandhaus և այլ նվագախմբեր:
ՀՀ մշակույթի նախարարության պատվերով՝ անվանի կոմպոզիտոր Տիգրան Մանսուրյանը հատուկ այս նախագծի համար հեղինակել է «Պոեմ հաղթանակի» նոր ստեղծագործությունը, որը կատարվեց առաջին անգամ:
Համերգացանկում ընդգրկված էին Արամ Խաչատրյանի, Բարսեղ Կանաչյանի, Ալան Հովհաննեսի, Առնո Բաբաջանյանի, Էդվարդ Միրզոյանի, Ղազարոս Սարյանի, Էդգար Հովհաննիսյանի, Ալեքսանդր Հարությունյանի, Ավետ Տերտերյանի, Կոնստանտին Օրբելյանի, Ալեքսանդր Աճեմյանի, Կոմիտաս-Շարաֆյանի, Սերժ Թանկյանի ստեղծագործություններից:
Նախագծին մասնակցեցին 70 հայ պրոֆեսիոնալ երաժիշտներ 20 երկրներից:
