Ապրիլի 25-ը մալարիայի համաշխարհային օրն է. 2006 թվականից Հայաստանում մալարիայի տեղական դեպքեր չեն արձանագրվել
Advertisement 1000 x 90

Ապրիլի 25-ը մալարիայի համաշխարհային օրն է. 2006 թվականից Հայաստանում մալարիայի տեղական դեպքեր չեն արձանագրվել

Առողջապահության համաշխարհային կազմակերպությունը (ԱՀԿ) յուրաքանչյուր տարի ապրիլի 25-ին նշում է Մալարիայի համաշխարհային օրը: Առողջապահության նախարարությունից տեղեկացրին, որ 2015 թվականի մայիսին Առողջապահության համաշխարհային վեհաժողովը հավանություն է տվել մալարիայի 2016-2030 թվականների գլոբալ ռազմավարությանը, որը նպատակներ է սահմանել 2030 թվականին առնվազն 90%-ով նվազեցնել մալարիայով հիվանդացությունը և մահացությունը, վերացնելով մալարիան առնվազն 35 երկրում, և կանխել մալարիայի կրկին արմատավորումը այն երկրներում, որոնք ազատ են մալարիայից:

2016 թվականին Առողջապահության համաշխարհային կազմակերպությունը հայտարարեց, որ ԱՀԿ-ի Եվրոպական տարածաշրջանը դարձել է աշխարհում առաջին մալարիայից լիովին ազատ տարածաշրջան: Եվ մալարիայի էլիմինացիայի (վերացման) պայքարում սա մեծ ձեռքբերում է Եվրոպայի և համաշխարհային հանրության համար: Սակայն հիվանդության վերադարձի վտանգը տարածաշրջան դեռևս մնում է, քանի որ մեծ է բերովի դեպքերի թիվը: Ձեռք բերված արդյունքները պահպանելու համար անհրաժեշտ է ինչպես քաղաքական հանձնառություն, այնպես էլ արդյունավետ համաճարակաբանական հսկողություն։

2006 թվականից ի վեր Հայաստանում մալարիայի տեղական դեպքեր չեն արձանագրվել և 2011 թվականին Առողջապահության համաշխարհային կազմակերպությունը Հայաստանի Հանրապետությունը վկայագրել է որպես մալարիայից ազատ տարածք: