Տպել
Կանադայի մայրաքաղաք Օտտավայում, Chateau Laurier հյուրանոցի առջեւ տեղադրվելու է կանադահայ աշխարհահռչակ լուսանկարիչ Յուսուֆ Քարշի կիսանդրին՝ ձեռքին լուսանկարչական սարք: Քանդակի հեղինակը Մկրտիչ Դարաքջյանն է: Վայրը, որտեղ տեղադրվելու է կիսանդրին, պատահական չի ընտրվել. Յուսուֆ Քարշն իր կնոջ հետ այդ հյուրանոցում ապրել է 18 տարի:
Համաձայնագիրը քաղաքային իշխանությունների հետ ստորագրել է Կանադայում ՀՀ դեսպան Արմեն Եգանյանը: Դեսպանությունից տեղեկանում ենք, որ Օտտավայում արդեն մեկնարկել են շինարարական աշխատանքները, եւ դեսպան Արմեն Եգանյանն անձամբ է ներկա եղել մեկնարկին:
Հայ լուսանկարչի կիսանդրին Օտտավայում տեղադրելու առթիվ դեսպան Արմեն Եգանյանն ասել էր. «Սա երախտապարտ հայ ժողովրդի նվերն է կանադացի ժողովրդին՝ Կանադայի 150-ամյակի եւ հայ-կանադական հարաբերությունների հաստատման 25-ամյակի առթիվ»:
Կանադական մամուլը գրում է, որ հայ լուսանկարիչ Յուսուֆ Քարշը մեծ ճանաչում ունի Օտտավայում, նշելով, որ Կանադայի խորհրդարանի խոսնակի գրասենյակում կախված է Ուինսթոն Չերչիլի դիմանկարը, որ լուսանկարել է Քարշը, եւ որ այդ ստեղծագործությունն աշխարհով մեկ ճանաչված է որպես եզակի ստեղծագործություն:
«Արևելք»
