«Չեմ կարողանում զոհված ընկերներիս ծնողների աչքերին նայել, մեղավորության զգացում եմ ունենում, որ ես կամ, իսկ իրենց տղաները՝ ոչ». Հերոս Նարեկը՝ Ճեմարանում

Անանիա Շիրակացու անվան ճեմարանի 704 խմբի սաները հյուրընկալել էին ապրիլյան պատերազմի օրերին հակառակորդի ուղղաթիռը խոցած ժամկետային զինծառայող Նարեկ Մալխասյանին, ով այսօր արդեն պայմանագրային ծառայող է և սովորում է Վ. Սարգսյանի անվան ռազմական ինստիտուտում:

Հակատանկային նռնականետով  ԼՂՀ տարածք (Ջաբրայիլի ուղղությամբ) ներխուժած  ադրբեջանական ուղղաթիռը խոցած, «Մարտական խաչ» 2-րդ աստիճանի շքանշանակիր չափազանց համեստ Նարեկը իր սխրանքի մասին սաների հարցին, պատասխանեց. «Ուղղակի ստացվեց: Հայտնվեցի ճիշտ պահին, ճիշտ տեղում: Իմ փոխարեն կարող էր լինել յուրաքանչյուրը: Ինձ թվում է՝ ով էլ լիներ, կփորձեր նույնն անել»:

Իսկ ամենադժվար հարցի պատասխանը, թերևս, կորցրած ընկերների մասին էր. «Չեմ կարողանում զոհված ընկերներիս ծնողների աչքերին նայել, մեղավորության զգացում եմ ունենում, որ ես կամ, իսկ իրենց տղաները՝ ոչ»:
Սաների հարցերը բազմազան էին ու հետաքրքիր, որոնց բոլորին էլ Նարեկը պատասխանում էր սիրով:

Անանիա Շիրակացու անվան ճեմարան