Տպել
Մահացու հիվանդ 11 ամսական տղայի՝ Չարլի Հարդի ծնողները՝ Քրիս Հարդն ու Քոննի Յեյթսը, դիմել են Լոնդոնի Բարձր դատարան, որպեսզի իրենց որդուն տուն տանելու թույլտվություն ստանան: Նրանց կարծիքով՝ հենց այնտեղ պետք է փոքրիկն անցկացնի կյանքի վերջին ժամերը:
Great Ormond Street Hospital (GOSH) կլինիկայում, որտեղ ներկայում գտնվում է տղան, մտավախոթյուն են հայտնել այդ կապակցությամբ: Լոնդոնյան հիվանդանոցի աշխատակիցները ծնողներին թույլ չեն տալիս երեխային տուն տանել, հայտարարել է ընտանիքի փաստաբան Գրանտ Արմսթրոնգը:
«Մենք պայքարում ենք խոչընդոտների դեմ, որոնք ստեղծում է հիվանդանոցը ծնողների ճանապարհին: Նրանք Չարլիի կարճ կյանքի ավարտից առաջ միասին կարճ ժամանակ անցկացնելու հույս ունեն»,- Լոնդոնի Բարձր դատարանի նիստում հայտարարել է Արմսթրոնգը:
Բժիշկները պարզաբանել են, թե ինչու դա հնարավոր չէ: Նրանք նշել են, որ տղան թոքերի արհեստական օդափոխման սարքավորման կարիք ունի: «Չարլիին հատուկ խնամք է անհրաժեշտ, որն անհնար է պարզեցնել»,- նշել են բուժհաստատության ներկայացուցիչները:
Լոնդոնի Բարձր դատարանը ծնողների հայցով վերջնական որոշում կկայացնի այսօր՝ հուլիսի 26-ին:
Չարլի Հարդի գործը լայն արձագանք է ստացել այն բանից հետո, երբ բրիտանական դատարաններն ու Մարդու իրավունքների եվրոպական դատարանը որոշում են կայացրել երեխային արհեստական շնչառության և կենսապահովման սարքերից անջատելու մասին:
Սակայն Չարլիի ծնողները՝ Քոննի Յեյթսն ու Քրիս Հարդը, մինչև վերջին պահը դեմ էին այդ որոշմանը ու ուզում էին շարունակել տղայի բուժումը: Նրանք նվիրատվություններով շուրջ 1.3 մլն ֆունտ էին հավաքել, ԱՄՆ-ում որդու փորձարարական բուժումը կազմակերպելու համար: Նրանք նաև օգնության խնդրանքով դիմել էին Հռոմի Պապին: Երեխան հազվագյուտ անբուժելի գենետիկ հիվանդություն ունի՝ միտոքոնդրիալ ԴՆԹ-ի քայքայման համախտանիշ:
Նախօրեին հայտնի էր դարձել, որ Յեյթսն ու Հարդը հետ են կանչել իրենց որդուն բուժման նպատակով ԱՄՆ ուղարկելու դիմումը՝ այդպիսով փաստացի դադարեցնելով տղային բուժելու իրավունքի համար դատական գործը:
