Տպել
ԵԱՀԿ Մինսկի խմբի ամերիկացի համանախագահ Հոգլանդի հայտարարությունը ստիպեց, որ Մամեդյարովն այսօր հայտարարություն անի բանակցությունների վերաբերյալ, թեև մինչև այս ադրբեջանական կողմը հերքում էր, որ որևէ փաստաթուղթ գոյություն ունի: Նման միտք Araratnews.am-ի հետ զրույցում հայտնեց քաղաքագետ Գագիկ Համբարյանը, անդրադառնալով Ադրբեջանի արտգործնախարար Էլմար Մամեդյարովի հայտարարությանը, որում նշվում է, որ Ադրբեջանը կողմ է ԵԱՀԿ Մինսկի խմբի համանախագահների կողմից ԼՂ հակամարտության կարգավորման առաջարկությունների փաթեթի վերաբերյալ սուբստանտիվ բանակցություններ սկսելուն:
«Ադրբեջանական կողմը միշտ հայտարարել է, որ ոչ մի փաստաթուղթ չկա: Եթե պաշտոնական Երևանը և Ստեփանակերտը գոնե հայտարարում են, որ բանակցություններն ընթանում են մադրիդյան թարմացված սկզբունքների շուրջ, ապա ադրբեջանական կողմը մինչև այսօր բացարձակապես հերքում էր և հայտարարում, որ ոչ մի այդպիսի փաստաթուղթ չկա, ոչ մի կետ չկա, որոնց վերաբերյալ կողմերի միջև համաձայնություն է եղել: Եվ այսօր` Հոգլանդի հայտարարության արդեն երկրորդ օրը, պարտադրեց, որ Մամեդյարովը հանդես գա հայտարարությամբ»,- նշեց մեր զրուցակիցը:
Ինչ վերաբերում է Ադրբեջանի արտգործնախարարի հայտարարության բովանդակությանը, քաղաքագետի խոսքով` այստեղ Մամեդյարովը որևէ նոր բան չի ասել. «Ադրբեջանի արտգործնախարարը փորձում է կեղծել բանակցային գործընթացի ամբողջ էությունը, և դա այն դեպքում, երբ հիմա կոնկրետ քննարկվում է խնդրի լուծման փաթեթային տարբերակը: Ադրբեջանի արտգործնախարարը մեզ կրկին հրամցնում է փուլային տարբերակը, և պատահական չէ, որ առաջինը, ինչպես Մամեդյարովն է առաջարկում, հայկական զորքերի դուրսբերումն է այսպես կոչված օկուպացված տարածքներից և փախստականների վերադարձը, և հետո նոր պետք է քննարկվի այն, ինչ առաջարկել է Հոգլանդը:
Այն, ինչ առաջարկում է Մամեդյարովը, խաբկանք է: Ադրբեջանական կողմը փորձում է խաբել մեզ և միջազգային հանրությանը, համոզելով, որ եկեք դուք մեզ սկզբից հողերը տվեք, այսպես կոչված փախստականները հետ գան, հետո նոր մնացած հարցերը կլուծվեն»:
Իսկ Հոգլանդի հայտարարությունը, ըստ Համբարյանի, նորություն չէր, մադրիդյան թարմացված սկզբունքներն էին, որոնց շուրջ 2007 թվականից բանակցություններ են ընթանում. «Հոգլանդն ընդամենը ադրբեջանական և հայկական հասարակությանը կրկին հիշեցրել է, որ բանակցություններն այս փուլով են ընթանում, և միևնույն ժամանակ հասկացրել, որ ՌԴ նախագահ Պուտինը, ով վերջերս շատ ակտիվ ստանձնել է միջնորդի դերակատարությունը Հայաստանի և Ադրբեջանի նախագահների հանդիպում կազմակերպելու համար… այդ հանդիպումները, ինչքան էլ Պուտինը կազմակերպի, միևնույն է` սեղանին դրված է մի փաստաթուղթ, որի թիկունքում ոչ միայն Ռուսաստանն է, այլ նաև ԱՄՆ և Եվրամիությունը` ի դեմս Ֆրանսիայի»:
