Արսեն Սաֆարյանն ու «SAF» ակումբի տնօրինությունը կոնֆլի՞կտ են ունեցել. «Հրապարակ»

«Հրապարակը» գրում է. «Մոտ մեկ տարի առաջ այս օրերին լրատվամիջոցները, իրար հերթ չտալով, գրում էին երգիչ Արսեն Սաֆարյանի նոր բիզնեսի՝ «SAF» ակումբի բացման մասին։ Երգիչը հարցազրույցներ էր տալիս և «մեծ սիրով կիսվում իր նոր բիզնեսի դժվարություններով»։

Վերջերս էլ լրատվամիջոցներից մեկին տված հարցազրույցի ժամանակ երգիչը «անկեղծացել էր»․ «Մոտ երեք տարի՝ ակումբի կառուցման շրջանից սկսած, ես մասնակցել եմ «SAF» ակումբի ստեղծմանը և բավականին ուժ ու եռանդ եմ դրել այնտեղ: Այնպես ստացվեց, որ ես այլևս կապ չունեմ ակումբի հետ։ Ես պահանջ չեմ ունեցել անունը փոխելու, բայց ինչպես լսել եմ, ակումբում պարզաբանում են, որ Փարիզում կա «SAF» անունով ակումբ, և այն իմ անվան հետ կապ չունի: Ինչևիցե, այդ ամենն ինձ արդեն հետաքրքիր էլ չէ»։

«SAF» ակումբից նախապես տեղեկացրին, որ հետաքրքիր մանրամասներ կպատմեն այս հարցի առնչությամբ, մինչդեռ երեկ տեղեկացանք, որ «փոշմանել են» և չեն ցանկանում որևէ մեկնաբանություն տալ՝ թերևս չուզենալով կոնֆլիկտը խորացնել։

Սակայն մեր աղբյուրներից տեղեկացանք, որ ակումբի անվանումը չի փոխվելու, իսկ թե ինչն է եղել պատճառը, որ Արսեն Սաֆարյանը «հեռացել է» ակումբից, մեր աղբյուրը նշեց, որ տնօրինության հետ երգիչը տարաձայնություններ է ունեցել, և դրանով է պայմանավորված նրա հեռանալը»։